hanse aur zulf apne ruKH pe gira di

hañse aur zulf apne ruḳh pe girā dī

mirī shām-e-furqat kī muddat baḌhā dī

talātum ne yuuñ merī himmat baḌhā dī

har ek mauj par ek kashtī lagā dī

huzūr-e-mohabbat se kuchh to milā hai

ġhanīmat hai ai dil ġham-e-nā-murādī

na aa.e to bigḌī rahī dil kī duniyā

magar jab maiñ royā to ye muskurā dī

ka.ī baar un se bhī bad-zan huā huuñ

ġhazab hai mohabbat kī be-e'timādī

muqayyad na thā 'aam thā un kā jalva

jabīñ maiñ ne har āstāñ par jhukā dī

vahī kāmyāb-e-mohabbat hai 'maikash'

ki jis ne mohabbat meñ hastī miTā dī

hanse aur zulf apne ruKH pe gira di

meri sham-e-furqat ki muddat baDha di

talatum ne yun meri himmat baDha di

har ek mauj par ek kashti laga di

huzur-e-mohabbat se kuchh to mila hai

ghanimat hai ai dil gham-e-na-muradi

na aae to bigDi rahi dil ki duniya

magar jab main roya to ye muskura di

kai bar un se bhi bad-zan hua hun

ghazab hai mohabbat ki be-e'timadi

muqayyad na tha 'am tha un ka jalwa

jabin main ne har aastan par jhuka di

wahi kaamyab-e-mohabbat hai 'maikash'

ki jis ne mohabbat mein hasti miTa di