ہنسے اور زلف اپنے رخ پہ گرا دی

ہنسے اور زلف اپنے رخ پہ گرا دی

مری شام فرقت کی مدت بڑھا دی

تلاطم نے یوں میری ہمت بڑھا دی

ہر ایک موج پر ایک کشتی لگا دی

حضور محبت سے کچھ تو ملا ہے

غنیمت ہے اے دل غم نا مرادی

نہ آئے تو بگڑی رہی دل کی دنیا

مگر جب میں رویا تو یہ مسکرا دی

کئی بار ان سے بھی بد ظن ہوا ہوں

غضب ہے محبت کی بے اعتمادی

مقید نہ تھا عام تھا ان کا جلوہ

جبیں میں نے ہر آستاں پر جھکا دی

وہی کامیاب محبت ہے میکشؔ

کہ جس نے محبت میں ہستی مٹا دی