main husn ki nazron se jab mahw-e-tamasha tha

maiñ husn kī nazroñ se jab mahv-e-tamāshā thā

ai be-kHudī-e-dil kyā tuune mujhe dekhā thā

ye mere tasavvur meñ hairat-kada kis kā thā

ik a.alam-e-be-rañgī nazreñ thiiñ na jalvā thā

tū vahm ke parde meñ mahrūm-e-tamāshā thā

parda jise samjhā thā ġhāfil vahī jalvā thā

ġhairat ne gavārā kī har haal meñ ḳhāmoshī

fitrat se shikāyat bhī kī go na taqāzā thā

haiñ chāk-garebāñ ke tevar meñ shikan ab tak

kal a.alam-e-vahshat meñ kis ne mujhe chheḌā thā

har haal mere dil kā ik hāl-e-musalsal hai

pahle bhī ġham-e-fardā merā ġham-e-fardā thā

nāzuk sī shagufta sī āvāz ik aa.ī thī

kyā tum ne mujhe dil ke parde se pukārā thā

bijlī kī tarah vo to lahrā ke hue pinhāñ

maiñ kis se kahūñ merā maqsūd-e-nazar kyā thā

āsūdgī-e-zarf-e-nazāra pe martā huuñ

ik jalva-e-nāqis bhī taskīn-e-tamāshā thā

majbūr-e-ta'alluq huuñ jab ġhaur kiyā maiñ ne

duniyā to na thī dil meñ lekin ġham-e-duniyā thā

kyā halqa-e-vahshat se miltī unheñ āzādī

dīvānoñ kī duniyā meñ sahrā pas-e-sahrā thā

mujh ko shab-e-ġhurbat meñ kyuuñ mūnis-e-ġham miltā

jo kaam thā fitrat kā har haal meñ tanhā thā

'sīmāb' mohabbat ke ālām kā shikvā kyā

insāñ pe mohabbat kā in.aam bhī kyā kyā thā

main husn ki nazron se jab mahw-e-tamasha tha

ai be-kHudi-e-dil kya tune mujhe dekha tha

ye mere tasawwur mein hairat-kada kis ka tha

ek aalam-e-be-rangi nazren thin na jalwa tha

tu wahm ke parde mein mahrum-e-tamasha tha

parda jise samjha tha ghafil wahi jalwa tha

ghairat ne gawara ki har haal mein KHamoshi

fitrat se shikayat bhi ki go na taqaza tha

hain chaak-gareban ke tewar mein shikan ab tak

kal aalam-e-wahshat mein kis ne mujhe chheDa tha

har haal mere dil ka ek haal-e-musalsal hai

pahle bhi gham-e-farda mera gham-e-farda tha

nazuk si shagufta si aawaz ek aai thi

kya tum ne mujhe dil ke parde se pukara tha

bijli ki tarah wo to lahra ke hue pinhan

main kis se kahun mera maqsud-e-nazar kya tha

aasudgi-e-zarf-e-nazara pe marta hun

ek jalwa-e-naqis bhi taskin-e-tamasha tha

majbur-e-ta'alluq hun jab ghaur kiya main ne

duniya to na thi dil mein lekin gham-e-duniya tha

kya halqa-e-wahshat se milti unhen aazadi

diwanon ki duniya mein sahra pas-e-sahra tha

mujh ko shab-e-ghurbat mein kyun munis-e-gham milta

jo kaam tha fitrat ka har haal mein tanha tha

'simab' mohabbat ke aalam ka shikwa kya

insan pe mohabbat ka inam bhi kya kya tha