main hun lazim ulfat ko mujhko lazim ulfat hai

maiñ huuñ lāzim ulfat ko mujh ko lāzim ulfat hai

maiñ huuñ apnī zarūrat se mujh se merī zarūrat hai

baa'd har ik nākāmī ke baḌhtī hai ummīd magar

pahle tumhārā shikvā thā ab apnī bhī shikāyat hai

tere sitam kā kyā shikvā tere karam kā kyā kahnā

jab bhī dil meñ hasrat thī ab bhī dil meñ hasrat hai

badlā hai ai shikva-e-dil kyā me'yār tamannā kā

varna jaisī pahle thī ab bhī un kī 'ināyat hai

tujh meñ ḳhū-e-sitam hai ho dil ko kyuuñ hai lazzat-e-ġham

shāyad merī tabī'at meñ shāmil terī tabī'at hai

yā ġham meñ bhī lazzat thī yā lazzat meñ bhī hai ġham

jis kī mohabbat rāhat thī us kā tasavvur aafat hai

yā vo ḳhud bhī 'maikash' the yā ab 'maikash' ḳhud hī nahīñ

kis se shurū’-e-ulfat thā kis pe ma.āl-e-ulfat hai

main hun lazim ulfat ko mujh ko lazim ulfat hai

main hun apni zarurat se mujh se meri zarurat hai

ba'd har ek nakaami ke baDhti hai ummid magar

pahle tumhaara shikwa tha ab apni bhi shikayat hai

tere sitam ka kya shikwa tere karam ka kya kahna

jab bhi dil mein hasrat thi ab bhi dil mein hasrat hai

badla hai ai shikwa-e-dil kya me'yar tamanna ka

warna jaisi pahle thi ab bhi un ki 'inayat hai

tujh mein KHu-e-sitam hai ho dil ko kyun hai lazzat-e-gham

shayad meri tabi'at mein shamil teri tabi'at hai

ya gham mein bhi lazzat thi ya lazzat mein bhi hai gham

jis ki mohabbat rahat thi us ka tasawwur aafat hai

ya wo KHud bhi 'maikash' the ya ab 'maikash' KHud hi nahin

kis se shuru’-e-ulfat tha kis pe maal-e-ulfat hai