main kis se kahun ai dil bas tujhko piya chahe

maiñ kis se kahauñ ai dil bas tujh ko piyā chāhe

sab kuchh maiñ karūñ arpan jo mujh ko piyā chāhe

is paap kī nagrī meñ har or añdherā hai

ujiyār meñ bas vo hai jo tujh ko piyā chāhe

is pyaar kī agnī ne tan-man ko jalā Daalā

phir bhī maiñ sakhī ḳhush huuñ dil tujh ko piyā chāhe

kahne ko har ik dulhan kahtī hai suhāgan huuñ

par vo hī suhāgan hai tū jis ko piyā chāhe

masjid hai ye mandir hai vo sāmne mai-ḳhāna

kis or maiñ ab jā۔ūñ ye dil to piyā chāhe

is rañg meñ ḳhush 'kāvish' is haal meñ hai raazī

jis haal meñ vo rakhe jis rañg ko piyā chāhe

main kis se kahaun ai dil bas tujh ko piya chahe

sab kuchh main karun arpan jo mujh ko piya chahe

is pap ki nagri mein har or andhera hai

ujiyar mein bas wo hai jo tujh ko piya chahe

is pyar ki agni ne tan-man ko jala Dala

phir bhi main sakhi KHush hun dil tujh ko piya chahe

kahne ko har ek dulhan kahti hai suhagan hun

par wo hi suhagan hai tu jis ko piya chahe

masjid hai ye mandir hai wo samne mai-KHana

kis or main ab ja۔un ye dil to piya chahe

is rang mein KHush 'kawish' is haal mein hai raazi

jis haal mein wo rakhe jis rang ko piya chahe