main kuchh samjhun ya kuchh bhi nahin hushiyar hun ya ghafil main hun

maiñ kuchh samjhūñ yā kuchh bhī nahīñ hushiyār huuñ yā ġhāfil maiñ huuñ

rahrav maiñ huuñ rahzan maiñ huuñ jaada maiñ huuñ manzil maiñ huuñ

ye mārka-e-husn-o-ulfat surḳhī hai mire afsāne kī

majnūñ maiñ huuñ sahrā maiñ huuñ lailā maiñ huuñ mahmil maiñ huuñ

hote haiñ atā nisbat se mirī har shai ko yahāñ alqāb-e-vajūd

dariyā maiñ huuñ kashtī maiñ huuñ tūfāñ maiñ huuñ sāhil maiñ huuñ

tū kyā jaane tū kyā samjhe rañg-e-majlis dāb-e-mahfil

zebā.ish-e-yak-mahfil tū hai āvāra-e-sad-mahfil maiñ huuñ

ye dard kī saarī shakleñ haiñ ye soz kī saarī shāneñ haiñ

tū kuchh ho ai sham.a-e-mahfil lekin saarī mahfil maiñ huuñ

maiñ yaad meñ terī rotā huuñ duniyā mire haal pe rotī hai

be-tāb-kun-e-yak-dil tū hai be-tāb-kun-e-sad-dil maiñ huuñ

'maikash' mire dam se baaqī hai duniyā meñ nishāñ māshūqoñ kā

ho jaan koī afsāne kī afsāna-nigār-e-dil maiñ huuñ

main kuchh samjhun ya kuchh bhi nahin hushiyar hun ya ghafil main hun

rahraw main hun rahzan main hun jada main hun manzil main hun

ye marka-e-husn-o-ulfat surKHi hai mere afsane ki

majnun main hun sahra main hun laila main hun mahmil main hun

hote hain ata nisbat se meri har shai ko yahan alqab-e-wajud

dariya main hun kashti main hun tufan main hun sahil main hun

tu kya jaane tu kya samjhe rang-e-majlis dab-e-mahfil

zebaish-e-yak-mahfil tu hai aawara-e-sad-mahfil main hun

ye dard ki sari shaklen hain ye soz ki sari shanen hain

tu kuchh ho ai shama-e-mahfil lekin sari mahfil main hun

main yaad mein teri rota hun duniya mere haal pe roti hai

be-tab-kun-e-yak-dil tu hai be-tab-kun-e-sad-dil main hun

'maikash' mere dam se baqi hai duniya mein nishan mashuqon ka

ho jaan koi afsane ki afsana-nigar-e-dil main hun