laga kar dil kisi se koi ruswa-e-jahan kyun ho

lagā kar dil kisī se koī rusvā-e-jahāñ kyuuñ ho

giraftār-e-balā-e-ġham-navā sanj-e-fuġhāñ kyuuñ ho

na kījiye gar sitam ham par to fariyād-o-fuġhāñ kyuuñ ho

rahe parda meñ gar ulfat ḳhalā.iq rāzdāñ kyuuñ ho

diyā hai ham ne dil apnā kisī kā kyā bigāḌā hai

zabān-e-ḳhalq par jaarī hamārī dāstāñ kyuuñ ho

jafā 'ādat tumhārī hai to phir ye mājrā kyā hai

batāo to adū tum ye bhalā phir mehrbāñ kyuuñ ho

taqāza aql kā hai zabt rakhnā soz-e-pinhāñ ko

kisī se kah ke rāz-e-ishq rusvā-e-jahāñ kyuuñ ho

na aa.e gar ḳhayāl-e-ġhamza-e-nāvik figan dil meñ

nafs nok-e-sinān ban ban ke pahlū meñ nihāñ kyuuñ ho

jī.e۔nge qum-be-iznillāh se kushte na ulfat ke

masīhā mo.ajiza apnā gañvāte rā.egāñ kyuuñ ho

ġharaz parda-nashīnī hai to baiTho ḳhāna-e-dil meñ

naqāb-e-afganda-e-mahfil meñ batāo to ayaañ kyuuñ ho

na khaTkā hai na vā hai chashm-e-dar phir ḳhauf kis kā hai

akele meñ hayā merī tumhāre darmiyāñ kyuuñ ho

kHayāl-e-qātil-e-īsa-nafs gar chhoḌ de ham ko

kashākash meñ ba-vaqt-e-naza.a jān-e-nā-tavāñ kyuuñ ho

banāyā 'be-kHudī' ne aap se be-ḳhud to phir kyā hai

zabān-e-ḳhalq kā khaTkā ḳhayāl-e-dushmanāñ kyuuñ ho

laga kar dil kisi se koi ruswa-e-jahan kyun ho

giraftar-e-bala-e-gham-nawa sanj-e-fughan kyun ho

na kijiye gar sitam hum par to fariyaad-o-fughan kyun ho

rahe parda mein gar ulfat KHalaiq raazdan kyun ho

diya hai hum ne dil apna kisi ka kya bigaDa hai

zaban-e-KHalq par jari hamari dastan kyun ho

jafa 'adat tumhaari hai to phir ye majra kya hai

batao to adu tum ye bhala phir mehrban kyun ho

taqaza aql ka hai zabt rakhna soz-e-pinhan ko

kisi se kah ke raaz-e-ishq ruswa-e-jahan kyun ho

na aae gar KHayal-e-ghamza-e-nawik figan dil mein

nafs nok-e-sinan ban ban ke pahlu mein nihan kyun ho

jie۔nge qum-be-iznillah se kushte na ulfat ke

masiha moajiza apna ganwate raegan kyun ho

gharaz parda-nashini hai to baiTho KHana-e-dil mein

naqab-e-afganda-e-mahfil mein batao to ayan kyun ho

na khaTka hai na wa hai chashm-e-dar phir KHauf kis ka hai

akele mein haya meri tumhaare darmiyan kyun ho

kHayal-e-qatil-e-isa-nafs gar chhoD de hum ko

kashakash mein ba-waqt-e-naza jaan-e-na-tawan kyun ho

banaya 'be-kHudi' ne aap se be-KHud to phir kya hai

zaban-e-KHalq ka khaTka KHayal-e-dushmanan kyun ho