yaro sanam ne hum ko KHuda se mila diya

yaaro sanam ne ham ko ḳhudā se milā diyā

parda uThā ke chehra-e-anvar dikhā diyā

dekh us kī raushnī ko maiñ hairat meñ āgayā

jalva dikhā ke saarī ḳhudī ko bhulā diyā

roz-e-azal se mast haiñ qaul-e-alast ke

qālū-balā kā jaam jo ham ko pilā diyā

e.ajāz-e-'īsvī qadam-e-dilrubā meñ hai

Thokar se apne paañv ke ham ko jilā diyā

'ḳhādim' duī ko chhoḌ ke jab yaar se milā

murshid ne rāh-e-fazl se rasta batā diyā

yaro sanam ne hum ko KHuda se mila diya

parda uTha ke chehra-e-anwar dikha diya

dekh us ki raushni ko main hairat mein aagaya

jalwa dikha ke sari KHudi ko bhula diya

roz-e-azal se mast hain qaul-e-alast ke

qalu-bala ka jam jo hum ko pila diya

eajaz-e-'iswi qadam-e-dilruba mein hai

Thokar se apne panw ke hum ko jila diya

'KHadim' dui ko chhoD ke jab yar se mila

murshid ne rah-e-fazl se rasta bata diya