yaro na DhunDhyo kahin zinhaar dekhna

yaaro na DhūñDhyo kahīñ zinhār dekhnā

apne hī dil meñ yaar ko har baar dekhnā

dekho samajh ke dekhiyo us shoḳh chashm ko

sab sūratoñ meñ us ko tarah-dār dekhnā

chashm-e-siyāh yaar Dase hai jahān ko

tīr-e-nigah meñ us kī samm-e-mār dekhnā

jis dil meñ dekhiye vahī 'aalī maqām hai

har shai meñ bas isī ko numūdār dekhnā

īmān mirā bhī hai suno tum ba-gosh-e-dil

hargiz bhaTak na rahiyo ḳhabar-dār dekhnā

saudā ham apnā kar chuke bāzār-e-faqr meñ

sab 'āshiqoñ meñ ham ko ḳharīdār dekhnā

'ḳhādim' uThā chukā hai bahut 'ishq kā maza

sab lazzatoñ meñ us ko mazā-dār dekhnā

yaro na DhunDhyo kahin zinhaar dekhna

apne hi dil mein yar ko har bar dekhna

dekho samajh ke dekhiyo us shoKH chashm ko

sab suraton mein us ko tarah-dar dekhna

chashm-e-siyah yar Dase hai jahan ko

tir-e-nigah mein us ki samm-e-mar dekhna

jis dil mein dekhiye wahi 'ali maqam hai

har shai mein bas isi ko numudar dekhna

iman mera bhi hai suno tum ba-gosh-e-dil

hargiz bhaTak na rahiyo KHabar-dar dekhna

sauda hum apna kar chuke bazar-e-faqr mein

sab 'ashiqon mein hum ko KHaridar dekhna

'KHadim' uTha chuka hai bahut 'ishq ka maza

sab lazzaton mein us ko maza-dar dekhna