maktab mein tujhe dekh kise hosh-e-sabaq hai

maktab meñ tujhe dekh kise hosh-e-sabaq hai

har tifl ke yaañ ashk se ālūda varaq hai

huuñ muntazir us mehr ke aane hī kā varna

shabnam kī tarah āñkhoñ meñ dam koī ramaq hai

dekh ai chaman-e-husn tujhe baaġh meñ ḳhandāñ

shabnam nahīñ ye gul pe ḳhajālat se araq hai

vo chāñd sā muñh surḳh dupaTTa meñ hai raḳhshāñ

yā mehr kahūñ jalva-numā zer-e-shafaq hai

nargis kī zar-o-gul pe bhī vā chashm-e-tama hai

is par ki zar-o-sīm kā us paas tabaq hai

dil us but-e-be-mehr ko de muft hī khoyā

kahte haiñ jo kuchh yaar mujhe vāqa.ī haq hai

juz tere nahīñ ġhair ko rah dil ke nagar meñ

jab se ki tire ishq kā yaañ nazm-o-nasaq hai

mazkūr huā yaañ magar us gul ke dahan kā

jo rashk se har ġhuncha kā dil baaġh meñ shaq hai

kar masqala-e-zikr se dil saaf tū apnā

'bedār' ye ā.īna tajallī-gah-e-haq hai

maktab mein tujhe dekh kise hosh-e-sabaq hai

har tifl ke yan ashk se aaluda waraq hai

hun muntazir us mehr ke aane hi ka warna

shabnam ki tarah aankhon mein dam koi ramaq hai

dekh ai chaman-e-husn tujhe bagh mein KHandan

shabnam nahin ye gul pe KHajalat se araq hai

wo chand sa munh surKH dupaTTa mein hai raKHshan

ya mehr kahun jalwa-numa zer-e-shafaq hai

nargis ki zar-o-gul pe bhi wa chashm-e-tama hai

is par ki zar-o-sim ka us pas tabaq hai

dil us but-e-be-mehr ko de muft hi khoya

kahte hain jo kuchh yar mujhe waqai haq hai

juz tere nahin ghair ko rah dil ke nagar mein

jab se ki tere ishq ka yan nazm-o-nasaq hai

mazkur hua yan magar us gul ke dahan ka

jo rashk se har ghuncha ka dil bagh mein shaq hai

kar masqala-e-zikr se dil saf tu apna

'bedar' ye aaina tajalli-gah-e-haq hai