malahat jawani tabassum ishaara

malāhat javānī tabassum ishārā

inhīñ kāfiroñ ne to shā.ir ko maarā

mohabbat bhī zālim ajab bebasī hai

na vo hī hamāre na dil hī hamārā

maiñ tinkoñ kā dāman pakaḌtā nahīñ huuñ

mohabbat meñ Duubā to kaisā sahārā

mujhe sat.h-e-ġham par abhī tairne do

maiñ Duubā to Duubā taġhazzul kā taarā

jo bismil banā de vo qātil tabassum

jo qātil banā de vo dilkash nazārā

mohabbat kā bhī khel nāzuk hai kitnā

nazar mil ga.ī aap jiite maiñ haarā

tumhārī umañgoñ kā kyā pūchhnā hai

bahāreñ tumhārī gulistāñ tumhārā

tumhārā 'nashvar' aur tumhārā taḳhayyul

mohabbat tumhārī to shā.ir tumhārā

malahat jawani tabassum ishaara

inhin kafiron ne to shair ko mara

mohabbat bhi zalim ajab bebasi hai

na wo hi hamare na dil hi hamara

main tinkon ka daman pakaDta nahin hun

mohabbat mein Duba to kaisa sahaara

mujhe sath-e-gham par abhi tairne do

main Duba to Duba taghazzul ka tara

jo bismil bana de wo qatil tabassum

jo qatil bana de wo dilkash nazara

mohabbat ka bhi khel nazuk hai kitna

nazar mil gai aap jite main haara

tumhaari umangon ka kya puchhna hai

bahaaren tumhaari gulistan tumhaara

tumhaara 'nashwar' aur tumhaara taKHayyul

mohabbat tumhaari to shair tumhaara