masiha ki dawaon se na chu-mantar se jata hai

masīhā kī davāoñ se na chū-mantar se jaatā hai

maraz ye 'ishq kā hai zikr-e-paiġhambar se jaatā hai

ġhulāmī un ke dar kī bādshāhī se bhī afzal hai

dar-e-kHairul-bashar se jo uThā dar-dar se jaatā hai

ye raaz afshāñ kiyā hai mujh pe mere pīr-o-murshid ne

ḳhudā ke ghar kā rasta mustafā ke ghar se jaatā hai

duā.eñ rañg laatī haiñ to phir saare ġhulāmoñ meñ

ḳhazāna panjtan kā rauza-e-at.har se jaatā hai

jahālat ke añdhere is tarah se duur hote haiñ

ujālā dīn-o-īmāñ kā dar-e-sarvar se jaatā hai

tasavvur meñ zafar aatā hai jab bhī gumbad-e-kHazrā

har ik aañsū adab se merī chashm-e-tar se jaatā hai

masiha ki dawaon se na chu-mantar se jata hai

maraz ye 'ishq ka hai zikr-e-paighambar se jata hai

ghulami un ke dar ki baadshahi se bhi afzal hai

dar-e-kHairul-bashar se jo uTha dar-dar se jata hai

ye raaz afshan kiya hai mujh pe mere pir-o-murshid ne

KHuda ke ghar ka rasta mustafa ke ghar se jata hai

duaen rang lati hain to phir sare ghulamon mein

KHazana panjtan ka rauza-e-athar se jata hai

jahaalat ke andhere is tarah se dur hote hain

ujala din-o-iman ka dar-e-sarwar se jata hai

tasawwur mein zafar aata hai jab bhi gumbad-e-kHazra

har ek aansu adab se meri chashm-e-tar se jata hai