kahte hain jinhen arsh pe rahte wo yahin hain

kahte haiñ jinheñ arsh pe rahte vo yahīñ haiñ

parde meñ mire dal ke vahī jalva-gazīñ haiñ

aalam meñ sarāpā hai unhīñ kā qad-o-qāmat

hai aañkh agar dekhiye kis jā vo nahīñ haiñ

aate haiñ tasavvur meñ tashaffī meñ haiñ sargarm

ham mahv-e-mohabbat haiñ to vo ham se qarīñ haiñ

ka.aba meñ haiñ yā dair meñ yā arsh-e-barīñ par

aate haiñ abhī sāmne chāho to kahīñ haiñ

bedārī ho yā ḳhvāb ho har haal meñ hai vasl

jo sāhab-e-nisbat haiñ magar ahl-e-yaqīñ haiñ

sab nuur zuhūr un kā hai 'mardāñ' maiñ kahūñ kyā

us ḳhātam-e-tan meñ mire vo misl-e-nagīñ haiñ

kahte hain jinhen arsh pe rahte wo yahin hain

parde mein mere dal ke wahi jalwa-gazin hain

aalam mein sarapa hai unhin ka qad-o-qamat

hai aankh agar dekhiye kis ja wo nahin hain

aate hain tasawwur mein tashaffi mein hain sargarm

hum mahw-e-mohabbat hain to wo hum se qarin hain

kaba mein hain ya dair mein ya arsh-e-barin par

aate hain abhi samne chaho to kahin hain

bedari ho ya KHwab ho har haal mein hai wasl

jo sahab-e-nisbat hain magar ahl-e-yaqin hain

sab nur zuhur un ka hai 'mardan' main kahun kya

us KHatam-e-tan mein mere wo misl-e-nagin hain