dard hai jis ka wo dilbar aur hai

dard hai jis kā vo dilbar aur hai

mehrbāñ dar-parda ham par aur hai

kishvar-e-tan meñ jo hai aurañg-e-dil

is sarīr-e-dil kā dāvar aur hai

ā.īna hai ā.īna-rūyoñ kā husn

bīnish us kī apne andar aur hai

mehr-o-mah se ho jise matlab sahīh

apnā yaañ ḳhurshīd-e-ḳhāvar aur hai

mah-jabīnoñ kā jo hai raushan-jamāl

us meñ raushan māh-e-anvar aur hai

hājiyoñ ko ho mubārak haj-e-īd

āshiqoñ kā haj-e-akbar aur hai

dozaḳh-o-firdosh se kuchh vāsta

yān-qayyim āb-e-kausar aur hai

kaam ka.aba se na hai ne der se

dīn-o-īmān yaañ birādar aur hai

dekhte haiñ sarv-qaddoñ ko jo ham

is meñ gul-gasht-e-sanobar aur hai

aarzū ham nāḳhudā kī kyuuñ kareñ

apnī kashtī kā to afsar aur hai

chaah kyuuñ rakheñ azīz-e-misr kī

apne yūsuf kā to kishvar aur hai

haiñ habāb-o-mauj shīrīñ aur ke

bahr-e-vahdat kā shanāvar aur hai

jaur-o-ġhamze haiñ kisī dilbar ke aur

par majāzan ik sitam-gar aur hai

jaur bhī ḳhush haiñ hameñ aur ham uns bhī

jo chhape ho yaañ to manzar aur hai

tai huī 'mardāñ' ye manzil ishq kī

ik qadam haañ ai dilāvar aur hai

dard hai jis ka wo dilbar aur hai

mehrban dar-parda hum par aur hai

kishwar-e-tan mein jo hai aurang-e-dil

is sarir-e-dil ka dawar aur hai

aaina hai aaina-ruyon ka husn

binish us ki apne andar aur hai

mehr-o-mah se ho jise matlab sahih

apna yan KHurshid-e-KHawar aur hai

mah-jabinon ka jo hai raushan-jamal

us mein raushan mah-e-anwar aur hai

hajiyon ko ho mubarak haj-e-id

aashiqon ka haj-e-akbar aur hai

dozaKH-o-firdosh se kuchh wasta

yan-qayyim aab-e-kausar aur hai

kaam kaba se na hai ne der se

din-o-iman yan biradar aur hai

dekhte hain sarw-qaddon ko jo hum

is mein gul-gasht-e-sanobar aur hai

aarzu hum naKHuda ki kyun karen

apnī kashti ka to afsar aur hai

chah kyun rakhen aziz-e-misr ki

apne yūsuf ka to kishwar aur hai

hain habab-o-mauj shirin aur ke

bahr-e-wahdat ka shanawar aur hai

jaur-o-ghamze hain kisi dilbar ke aur

par majazan ek sitam-gar aur hai

jaur bhi KHush hain hamein aur hum uns bhi

jo chhape ho yan to manzar aur hai

tai hui 'mardan' ye manzil ishq ki

ek qadam han ai dilawar aur hai