mat puchh mujhse kyun hai tera rang zard phir

mat pūchh mujh se kyuuñ hai tirā rañg zard phir

uThne lagā hai siine meñ zālim vo dard phir

kūcha meñ us ke jab ga.e tab mahv ho ga.e

mānind naqsh-e-pā koī aate haiñ mard phir

kis taur mirī chashm se jaarī na hove aab

kūcha se us ke laa.ī sabā āh-e-gard phir

hai inqilāb-e-charḳh go pur-kār kī tarh

jab tak ki dam meñ dam hai tu sahrā-navard phir

kis taur muztarib na hoñ ai 'ishq' tū hī kah

aane lagī zabāñ pe tirī āh-e-sard phir

is daur meñ jo raushnī-e-dil murād hai

mānind āftāb ke tu 'ishq' fard phir

mat puchh mujh se kyun hai tera rang zard phir

uThne laga hai sine mein zalim wo dard phir

kucha mein us ke jab gae tab mahw ho gae

manind naqsh-e-pa koi aate hain mard phir

kis taur meri chashm se jari na howe aab

kucha se us ke lai saba aah-e-gard phir

hai inqilab-e-charKH go pur-kar ki tarh

jab tak ki dam mein dam hai tu sahra-naward phir

kis taur muztarib na hon ai 'ishq' tu hi kah

aane lagi zaban pe teri aah-e-sard phir

is daur mein jo raushni-e-dil murad hai

manind aaftab ke tu 'ishq' fard phir