مت پوچھ مجھ سے کیوں ہے ترا رنگ زرد پھر

مت پوچھ مجھ سے کیوں ہے ترا رنگ زرد پھر

اٹھنے لگا ہے سینے میں ظالم وہ درد پھر

کوچہ پہ اس کے جب گئے تب محو ہو گئے

مانند نقش پا کوئی آتے ہیں مرد پھر

کس طور مری چشم سے جاری نہ ہووے آب

کوچہ سے اس کے لائی صبا آہ گرد پھر

ہے انقلاب چرخ گو پُر کار کی طرح

جب تک کہ دم میں دم ہے تو صحرا نورد پھر

کس طور مضطرب نہ ہوں اے عشقؔ تو ہی کہہ

آنے لگی زباں پہ تری آہ سرد پھر

اس دور میں جو روشنیٔ دل مراد ہے

مانند آفتاب کے تو عشقؔ فرد پھر