samajhta hai dil-e-nadan ki maine kab kiya kuchh hai

samajhtā hai dil-e-nādāñ ki maiñ ne kab kiyā kuchh hai

farishtoñ ne ḳhudā jaane kahāñ se likh diyā kuchh hai

nigāh-e-nāz kahtī hai tirā dil kyā kareñ lekar

na us meñ jaan baaqī hai na himmat hausla kuchh hai

ḳhat-e-taqdīr tauba tauba kyā tahrīr-e-dushman hai

ki har ik harf par dhokā hai kuchh kā likh gayā kuchh hai

miTā dī fard merī dāvar-e-mahshar ne ye kah kar

kareñ kyā shāfa-e-mahshar ne is par likh diyā kuchh hai

vo aisī vaisī shai to muñh lagāte hī nahīñ 'nayyar'

jinheñ jām-e-mai-e-ulfat kā chaskā paḌ gayā kuchh hai

samajhta hai dil-e-nadan ki main ne kab kiya kuchh hai

farishton ne KHuda jaane kahan se likh diya kuchh hai

nigah-e-naz kahti hai tera dil kya karen lekar

na us mein jaan baqi hai na himmat hausla kuchh hai

KHat-e-taqdir tauba tauba kya tahrir-e-dushman hai

ki har ek harf par dhoka hai kuchh ka likh gaya kuchh hai

miTa di fard meri dawar-e-mahshar ne ye kah kar

karen kya shafa-e-mahshar ne is par likh diya kuchh hai

wo aisi waisi shai to munh lagate hi nahin 'nayyar'

jinhen jam-e-mai-e-ulfat ka chaska paD gaya kuchh hai