سمجھتا ہے دل ناداں کہ میں نے کب کیا کچھ ہے

سمجھتا ہے دل ناداں کہ میں نے کب کیا کچھ ہے

فرشتوں نے خدا جانے کہاں سے لکھ دیا کچھ ہے

نگاہ ناز کہتی ہے ترا دل کیا کریں لے کر

نہ اس میں جان باقی ہے نہ ہمت حوصلہ کچھ ہے

خط تقدیر توبہ توبہ کیا تحریر دشمن ہے

کہ ہر اک حرف پر دھوکا ہے کچھ کا لکھ گیا کچھ ہے

مٹا دی فرد میری داور محشر نے یہ کہہ کر

کریں کیا شافع محشر نے اس پر لکھ دیا کچھ ہے

وہ ایسی ویسی شے تو منہ لگاتے ہی نہیں نیرؔ

جنہیں جام مئے الفت کا چسکا پڑ گیا کچھ ہے