jab dayar-e-yar se ThanDi hawa aane lagi

jab dayār-e-yār se ThanDī havā aane lagī

mere dil par kuchh ajab sī kaifiyat chhāne lagī

bārish-e-rahmat huī jab gulistān-e-shauq meñ

dil kī pazhmurda kalī meñ tāzgī aane lagī

jab mirā jī kulfat-e-duniyā se ghabrāne lagā

aake terī yaad mere dil ko samjhāne lagī

sehn-e-dil meñ chhā ga.ī har-sū udāsī kī fazā

jab shikast-e-sāz-e-ulfat kī sadā aane lagī

āsmān-e-dil pe jab raushan huā māh-e-yaqīñ

shām-e-ġham kī tīrgī meñ raushnī aane lagī

maiñ ne us kā kyā bigāḌā hai bhalā ai ham-nashīñ

kis liye duniyā mire uupar sitam Dhāne lagī

jab mirā saaya bhī merā dushman-e-jāñ ho gayā

aap hī kī yaad se maiñ jī ko bahlāne lagī

jab dayar-e-yar se ThanDi hawa aane lagi

mere dil par kuchh ajab si kaifiyat chhane lagi

barish-e-rahmat hui jab gulistan-e-shauq mein

dil ki pazhmurda kali mein tazgi aane lagi

jab mera ji kulfat-e-duniya se ghabrane laga

aake teri yaad mere dil ko samjhane lagi

sehn-e-dil mein chha gai har-su udasi ki faza

jab shikast-e-saz-e-ulfat ki sada aane lagi

aasman-e-dil pe jab raushan hua mah-e-yaqin

sham-e-gham ki tirgi mein raushni aane lagi

main ne us ka kya bigaDa hai bhala ai ham-nashin

kis liye duniya mere upar sitam Dhane lagi

jab mera saya bhi mera dushman-e-jaan ho gaya

aap hi ki yaad se main ji ko bahlane lagi