asar ab tak fareb khata hai

'asar' ab tak fareb khātā hai

terī bātoñ ko maan jaatā hai

dil kaḌā kar ke tujh se kuchh to kahūñ

jī meñ sau baar ye hī aatā hai

ḳhush guzartī nahīñ hai koī aan

ishtiyāq ab nipaT satātā hai

dil ko va.ade se kal nahīñ hotī

rose tū āj-kal batātā hai

but-e-kāfir kī be-muravvatiyāñ

ye hameñ sab ḳhudā dikhātā hai

dil mirā tū ne hī churāyā hai

nahīñ yuuñ nazreñ kyuuñ churātā hai

maiñ bhī nāseh use samajhtā huuñ

go burā hai pe mujh ko bhātā hai

tere dar par maiñ kab kab aatā huuñ

dil mujhe baar baar laatā hai

nāla-o-āh ko mire sun kar

kahte ho yaañ kise sunātā hai

roz-o-shab kis tarah basar maiñ karūñ

ġham tirā ab to jī hī khātā hai

dil-e-nā-qadr-dāñ ye gauhar-e-ashk

nit yūñhī ḳhaak meñ milātā hai

jī hī jaatā hai dam-ba-dam merā

tujh ko bāvar nahīñ ye aatā hai

sham.a-rū dil ye misl-e-parvāna

nāhaq apne ta.iiñ jalātā hai

terī in sho.ala-ḳhūyoñ ke huzūr

be-tarh tujh pe jī jalātā hai

kyā karūñ aah maiñ 'asar' kā ilaaj

is ghaḌī us kā jī hī jaatā hai

'asar' ab tak fareb khata hai

teri baaton ko man jata hai

dil kaDa kar ke tujh se kuchh to kahun

ji mein sau bar ye hi aata hai

KHush guzarti nahin hai koi aan

ishtiyaq ab nipaT satata hai

dil ko wade se kal nahin hoti

rose tu aaj-kal batata hai

but-e-kafir ki be-murawwatiyan

ye hamein sab KHuda dikhata hai

dil mera tu ne hi churaya hai

nahin yun nazren kyun churaata hai

main bhi naseh use samajhta hun

go bura hai pe mujh ko bhata hai

tere dar par main kab kab aata hun

dil mujhe bar bar lata hai

nala-o-ah ko mere sun kar

kahte ho yan kise sunata hai

roz-o-shab kis tarah basar main karun

gham tera ab to ji hi khata hai

dil-e-na-qadr-dan ye gauhar-e-ashk

nit yunhi KHak mein milata hai

ji hi jata hai dam-ba-dam mera

tujh ko bawar nahin ye aata hai

shama-ru dil ye misl-e-parwana

nahaq apne tain jalata hai

teri in shoala-KHuyon ke huzur

be-tarh tujh pe ji jalata hai

kya karun aah main 'asar' ka ilaj

is ghaDi us ka ji hi jata hai