wahshat-zada dil to jun sharar hai

vahshat-zada dil to juuñ sharar hai

us ke ta.iiñ aap se safar hai

tum jaur-o-jafā kaaro jo chāho

in bātoñ pe kab mujhe nazar hai

tū aap hī ḳhair aap shar hai

kuchh aur na naf.a nai zarar hai

ham be-ḳhabroñ se rah ḳhabar-dār

itnī to bhalā tujhe ḳhabar hai

guzrī jaatī hai har tarah se

duniyā guzrān sar-ba-sar hai

dil ke ḳhatroñ se be-ḳhatar huuñ

sar se paañv talak ḳhatar hai

tū ne hī to yuuñ niDar kiyā hai

bas ek mujhe tirā hī Dar hai

yuuñ dard ba-jān-o-dil samāyā

har nāla-o-āh kārgar hai

yā hazrat-e-andalīb baḳhshish

ye tere hī dard kā asar hai

dil terī taraf hai nit par us ko

ma.alūm nahīñ ki tū kidhar hai

yuuñ aañkh se aañkh meñ milā hai

itnā to mirā dil-o-jigar hai

be-dard tū kyūñ-ki rah sakegā

ye hazrat-e-'dard' kā 'asar' hai

wahshat-zada dil to jun sharar hai

us ke tain aap se safar hai

tum jaur-o-jafa karo jo chaho

in baaton pe kab mujhe nazar hai

tu aap hi KHair aap shar hai

kuchh aur na nafa nai zarar hai

hum be-KHabron se rah KHabar-dar

itni to bhala tujhe KHabar hai

guzri jati hai har tarah se

duniya guzran sar-ba-sar hai

dil ke KHatron se be-KHatar hun

sar se panw talak KHatar hai

tu ne hi to yun niDar kiya hai

bas ek mujhe tera hi Dar hai

yun dard ba-jaan-o-dil samaya

har nala-o-ah kargar hai

ya hazrat-e-andalib baKHshish

ye tere hi dard ka asar hai

dil teri taraf hai nit par us ko

malum nahin ki tu kidhar hai

yun aankh se aankh mein mila hai

itna to mera dil-o-jigar hai

be-dard tu kyun-ki rah sakega

ye hazrat-e-'dard' ka 'asar' hai