dekh kar dil ko pech-o-tab ke beach

dekh kar dil ko pech-o-tāb ke beach

aa paḌā muft maiñ azaab ke beach

kaun rahtā hai tere ġham ke sivā

is dil-e-ḳhānumāñ-ḳharāb ke beach

tere ātish-zadoñ ne misl-sharār

umr kaaTī hai iztirāb ke beach

kyā kahūñ tujh se ab ke maiñ tujh ko

kis tarah dekhtā huuñ ḳhvāb ke beach

sham.a fānūs meñ na jab ke chhupe

kab chhupe hai ye muñh naqāb ke beach

Tuk tabassum ne kī shakar-rezī

baare ab talḳhī-e-itāb ke beach

kyā kahe vo ki sab huvaidā hai

shaan terī tirī kitāb ke beach

hai ġhulāmī 'asar' ko hazrat-e-'dard'

ba-dil-o-jāñ tirī janāb ke beach

dekh kar dil ko pech-o-tab ke beach

aa paDa muft main azab ke beach

kaun rahta hai tere gham ke siwa

is dil-e-KHanuman-KHarab ke beach

tere aatish-zadon ne misl-sharar

umr kaTi hai iztirab ke beach

kya kahun tujh se ab ke main tujh ko

kis tarah dekhta hun KHwab ke beach

shama fanus mein na jab ke chhupe

kab chhupe hai ye munh naqab ke beach

Tuk tabassum ne ki shakar-rezi

bare ab talKHi-e-itab ke beach

kya kahe wo ki sab huwaida hai

shan teri teri kitab ke beach

hai ghulami 'asar' ko hazrat-e-'dard'

ba-dil-o-jaan teri janab ke beach