shabab-o-husn-o-haqiqat se khelta hun main

shabāb-o-husn-o-haqīqat se kheltā huuñ maiñ

gunāh-gār huuñ rahmat se kheltā huuñ maiñ

nigāh-e-nāz ishāre bahār-e-daur-e-nishāt

jahān-e-husn kī daulat se kheltā huuñ maiñ

kisī hasīn sharārat se khelne ke liye

ḳhud apne dil kī harārat se kheltā huuñ maiñ

tirī sharīr nigāheñ payām detī haiñ

payām-e-jurm-e-mohabbat se kheltā huuñ maiñ

tirā firāq tiirā intizār terā ḳhayāl

ye muḳhtasar hai qiyāmat se kheltā huuñ maiñ

shabab-o-husn-o-haqiqat se khelta hun main

gunah-gar hun rahmat se khelta hun main

nigah-e-naz ishaare bahaar-e-daur-e-nishat

jahan-e-husn ki daulat se khelta hun main

kisi hasīn shararat se khelne ke liye

KHud apne dil ki hararat se khelta hun main

teri sharir nigahen payam deti hain

payam-e-jurm-e-mohabbat se khelta hun main

tera firaq tera intizar tera KHayal

ye muKHtasar hai qiyamat se khelta hun main