dil mein sama ke aankh se parda na kijiye

dil meñ samā ke aañkh se parda na kījiye

banda-navāz dekhiye aisā na kījiye

kambaḳht kah ke ab mujhe rusvā na kījiye

yuuñ inkishāf jurm-e-tamannā na kījiye

apnī nazar se merā tamāsha na kījiye

mahshar jahān-e-ishq meñ barpā na kījiye

maiñ aap kā huuñ aap se bāhar nahīñ huuñ maiñ

mere liye takalluf bejā na kījiye

zahmat to hogī ek nazar kī ḳhatā muaaf

anjām car kī mere parvā na kījiye

duniyā hazār tarah kī bāteñ banā.egī

apnā banā ke mujhe kinārā na kījiye

dil aa gayā to jā.egā duniyā ke kaam se

us par navāzishāt ḳhudārā na kījiye

gustāḳh ho ke chuum na le chāñd sī jabīñ

chehre ko ā.īne meñ utārā na kījiye

'zaidī' kā zikr aap kareñ aur hañsī ke saath

duniyā hañsī uḌā.egī aisā na kījiye

dil mein sama ke aankh se parda na kijiye

banda-nawaz dekhiye aisa na kijiye

kambaKHt kah ke ab mujhe ruswa na kijiye

yun inkishaf jurm-e-tamanna na kijiye

apni nazar se mera tamasha na kijiye

mahshar jahan-e-ishq mein barpa na kijiye

main aap ka hun aap se bahar nahin hun main

mere liye takalluf beja na kijiye

zahmat to hogi ek nazar ki KHata muaf

anjam car ki mere parwa na kijiye

duniya hazar tarah ki baaten banaegi

apna bana ke mujhe kinara na kijiye

dil aa gaya to jaega duniya ke kaam se

us par nawazishat KHudara na kijiye

gustaKH ho ke chum na le chand si jabin

chehre ko aaine mein utara na kijiye

'zaidi' ka zikr aap karen aur hansi ke sath

duniya hansi uDaegi aisa na kijiye