har fitna-o-takHrib se bezar mile hain

har fitna-o-takHrīb se bezār mile haiñ

mai-ḳhāne meñ kuchh sāhab-e-kirdār mile haiñ

duniyā jinheñ dīvāna samajhtī rahī barsoñ

aksar vahī dīvāne sar-e-dār mile haiñ

phir zulmat-e-daurāñ kī jabīñ hai shikan-ālūd

phir ek na.ī sub.h ke āsār mile haiñ

ye jalva-e-kaunain hai kis ke liye āḳhir

ye dīda-o-dil kyā yuuñ hī be-kār mile haiñ

hai misr ke bāzār kī bhī shaan nirālī

sab ek hī sūrat ke ḳharīdār mile haiñ

sayyād kī sāzish hai na gulchīñ kī ḳhatā hai

phūloñ kī mohabbat meñ hameñ ḳhaar mile haiñ

is daur-e-pur-āshob meñ masmūm fazā meñ

sirf ahl-e-junūñ ham ko ḳhabar-dār mile haiñ

'merāj' ġham-e-yār kī baat apnī jagah hai

milne ko mujhe saiñkaḌoñ ġham-ḳhvār mile haiñ

har fitna-o-takHrib se bezar mile hain

mai-KHane mein kuchh sahab-e-kirdar mile hain

duniya jinhen diwana samajhti rahi barson

aksar wahi diwane sar-e-dar mile hain

phir zulmat-e-dauran ki jabin hai shikan-alud

phir ek nai subh ke aasar mile hain

ye jalwa-e-kaunain hai kis ke liye aaKHir

ye dida-o-dil kya yun hi be-kar mile hain

hai misr ke bazar ki bhi shan nirali

sab ek hi surat ke KHaridar mile hain

sayyaad ki sazish hai na gulchin ki KHata hai

phulon ki mohabbat mein hamein KHar mile hain

is daur-e-pur-ashob mein masmum faza mein

sirf ahl-e-junun hum ko KHabar-dar mile hain

'meraj' gham-e-yar ki baat apni jagah hai

milne ko mujhe sainkaDon gham-KHwar mile hain