ہر فتنہ و تخریب سے بیزار ملے ہیں

ہر فتنہ و تخریب سے بیزار ملے ہیں

مے خانے میں کچھ صاحب کردار ملے ہیں

دنیا جنہیں دیوانہ سمجھتی رہی برسوں

اکثر وہی دیوانے سر دار ملے ہیں

پھر ظلمت دوراں کی جبیں ہے شکن آلود

پھر ایک نئی صبح کے آثار ملے ہیں

یہ جلوۂ کونین ہے کس کے لئے آخر

یہ دیدہ و دل کیا یوں ہی بیکار ملے ہیں

ہے مصر کے بازار کی بھی شان نرالی

سب ایک ہی صورت کے خریدار ملے ہیں

صیاد کی سازش ہے نہ گلچیں کی خطا ہے

پھولوں کی محبت میں ہمیں خار ملے ہیں

اس دور پر آشوب میں مسموم فضا میں

صرف اہل جنوں ہم کو خبردار ملے ہیں

معراجؔ غم یار کی بات اپنی جگہ ہے

ملنے کو مجھے سینکڑوں غم خوار ملے ہیں