mere sath mahshar ka jhagDa nahin hai

mere sath mahshar kā jhagḌā nahīñ hai

mohabbat meñ imroz-o-fardā nahīñ hai

vahāñ jalva hai jalva-farmā nahīñ hai

mirā dil madīna hai ka.aba nahīñ hai

jo Dālūñ nigh-e-tūr de uTThe sho.ala

marī aañkh kuchh chashm-e-mūsā nahīñ hai

yahāñ aake uThte haiñ āñkhoñ se parde

madīna hai ye tūr-e-sīnā nahīñ hai

mubārak use ho vo rusvā-e-lailā

mujhe qais kī tarh saudā nahīñ hai

na chashm-e-basīrat na ham ko basārat

kahe kaun vo kyā hai vo kyā nahīñ hai

nasheman na jibra.īl us par banā.īñ

ye naḳhl-e-madīna hai tuubā nahīñ hai

na tinkā bane aañkh kā dashte-aiman

terā jalva barq-e-tajallī nahīñ hai

ga.e kahte shaidā-e-qāmat kisī ke

ye vo raah hai jis meñ saayā nahīñ hai

madīne meñ rahtī haiñ nīchī nigāheñ

adab-gāh ye hai tamāshā nahīñ hai

bahār-e-lahad ḳhuld meñ yaad aa.ī

ghaTā vo nahīñ hai vo sabza nahīñ hai

nahīñ hai koī dūsrā mere dil meñ

are tū hai terī tamannā nahīñ hai

bahut kuchh in āñkhoñ se dekhā hai maiñ ne

vahī ek hai jis ko dekhā nahīñ hai

haram kī azaañ pahuñche kyā mai-kade meñ

kisī kī vahāñ koī suntā nahīñ hai

'riyāz' us ko rahtā hai ik ḳhum kā nasha

adab se haram meñ jo piitā nahīñ hai

mere sath mahshar ka jhagDa nahin hai

mohabbat mein imroz-o-farda nahin hai

wahan jalwa hai jalwa-farma nahin hai

mera dil madina hai kaba nahin hai

jo Dalun nigh-e-tur de uTThe shoala

mari aankh kuchh chashm-e-musa nahin hai

yahan aake uThte hain aankhon se parde

madina hai ye tur-e-sina nahin hai

mubarak use ho wo ruswa-e-laila

mujhe qais ki tarh sauda nahin hai

na chashm-e-basirat na hum ko basarat

kahe kaun wo kya hai wo kya nahin hai

nasheman na jibrail us par banain

ye naKHl-e-madina hai tuba nahin hai

na tinka bane aankh ka dashte-aiman

tera jalwa barq-e-tajalli nahin hai

gae kahte shaida-e-qamat kisi ke

ye wo rah hai jis mein saya nahin hai

madine mein rahti hain nichi nigahen

adab-gah ye hai tamasha nahin hai

bahaar-e-lahad KHuld mein yaad aai

ghaTa wo nahin hai wo sabza nahin hai

nahin hai koi dusra mere dil mein

are tu hai teri tamanna nahin hai

bahut kuchh in aankhon se dekha hai main ne

wahi ek hai jis ko dekha nahin hai

haram ki azan pahunche kya mai-kade mein

kisi ki wahan koi sunta nahin hai

'riyaz' us ko rahta hai ek KHum ka nasha

adab se haram mein jo pita nahin hai