meri wahshat mera jahan koi

merī vahshat mirā jahāñ koī

mere dil ko nahīñ amaañ koī

dil meñ kyā hai kyā koī samjhe

kaash samjhe na kuchh yahāñ koī

un kī vahshat se dil ye zinda hai

qalb-e-uryāñ meñ hai nihāñ koī

dard-e-dil kī davā mayassar ho

gar banā hai masīh yaañ koī

haal dil kā yahāñ kahūñ kis ko

ahl-e-dil haiñ na yaañ butāñ koī

yuuñ to har dam hujūm ghere thā

phir bhī tanhā rahā yahāñ koī

nesh-e-mizhgāñ jo dil meñ hai paivast

ya.anī har dam hai zaḳhm-e-navāñ koī

hā-e-be-kārī-e-dil aafat hai

go ho āshufta be-karāñ koī

sadma-e-ishq kā asar ye huā

hai jigar naala dil fuġhāñ koī

meri wahshat mera jahan koi

mere dil ko nahin aman koi

dil mein kya hai kya koi samjhe

kash samjhe na kuchh yahan koi

un ki wahshat se dil ye zinda hai

qalb-e-uryan mein hai nihan koi

dard-e-dil ki dawa mayassar ho

gar bana hai masih yan koi

haal dil ka yahan kahun kis ko

ahl-e-dil hain na yan butan koi

yun to har dam hujum ghere tha

phir bhi tanha raha yahan koi

nesh-e-mizhgan jo dil mein hai paiwast

yani har dam hai zaKHm-e-nawan koi

ha-e-be-kari-e-dil aafat hai

go ho aashufta be-karan koi

sadma-e-ishq ka asar ye hua

hai jigar nala dil fughan koi