mera ishq manzar-e-am par tera husn parda-e-raaz mein

mirā ishq manzar-e-ām par tirā husn parda-e-rāz meñ

yahī farq roz-e-azal se hai tire naaz mere niyāz meñ

na haqīqatoñ se mujhe ġharaz na qadam hai merā majāz meñ

ki maiñ huuñ talāsh-e-jamāl meñ ki maiñ huuñ tajassus-e-nāz meñ

mere sajda-hā-e-junūñ ko ab kisī dar se kuchh nahīñ vāsta

ki hazār ka.aba-o-dair haiñ mirī ik jabīn-e-niyāz meñ

na vo hosh hai na vo be-ḳhudī na ḳhirad rahī na junūñ rahā

ye tirī nazar kī haiñ shoḳhiyāñ ye kamāl hai tire naaz meñ

mujhe kyā ḳhabar ki baqā hai kyā mujhe kyā ḳhabar ki fanā hai kyā

ki maiñ do-jahāñ se huuñ be-ḳhabar tire ishq-e-fitna-navāz meñ

ye duā hai 'qaisar-e-vārsī' ki madīna merā maqām ho

mirī zindagī kī jo shaam ho to sahr ho us kī hijāz meñ

mera ishq manzar-e-am par tera husn parda-e-raaz mein

yahi farq roz-e-azal se hai tere naz mere niyaz mein

na haqiqaton se mujhe gharaz na qadam hai mera majaz mein

ki main hun talash-e-jamal mein ki main hun tajassus-e-naz mein

mere sajda-ha-e-junun ko ab kisi dar se kuchh nahin wasta

ki hazar kaba-o-dair hain meri ek jabin-e-niyaz mein

na wo hosh hai na wo be-KHudi na KHirad rahi na junun raha

ye teri nazar ki hain shoKHiyan ye kamal hai tere naz mein

mujhe kya KHabar ki baqa hai kya mujhe kya KHabar ki fana hai kya

ki main do-jahan se hun be-KHabar tere ishq-e-fitna-nawaz mein

ye dua hai 'qaisar-e-warsi' ki madina mera maqam ho

meri zindagi ki jo sham ho to sahr ho us ki hijaz mein