le gaya dil chhin kar dildar apne hath se

le gayā dil chhīn kar dildār apne haath se

mujh ko ghā.il kar gayā vo yaar apne haath se

maiñ to soyā thā paḌā ḳhvāb-e-adam meñ chain se

ḳhud-ba-ḳhud mujh ko kiyā bedār apne haath se

furqat-e-hamdam meñ jiine kā bharosa kuchh nahīñ

haaye zaḳhmī kar gayā ḳhuñḳhār apne haath se

lag ga.ī ishq-e-butāñ kī aag jis ko ai miyāñ

phūñk Daalā us ne sab ghar-bār apne haath se

gar nahīñ manzūr tujh ko vasl ai qātil mere

pher de hulqūm par talvār apne haath se

laash merī dekh kar kahne laggā vo tursh-rū

dafn kar deñge use sau baar apne haath se

nabz merī dekh kar bolā tabīb-e-rāz-dāñ

de ke dil us ne liyā āzār apne haath se

yā muīnuddīn chishtī bahr-e-ġham meñ huuñ paḌā

apne bande ko kaaro tum paar apne haath se

'mīrāñ' shaah roz-e-hashar ko jaam kausar kā miyāñ

deñge tujh ko haidar-e-karrār apne haath se

le gaya dil chhin kar dildar apne hath se

mujh ko ghail kar gaya wo yar apne hath se

main to soya tha paDa KHwab-e-adam mein chain se

KHud-ba-KHud mujh ko kiya bedar apne hath se

furqat-e-hamdam mein jine ka bharosa kuchh nahin

haye zaKHmi kar gaya KHunKHar apne hath se

lag gai ishq-e-butan ki aag jis ko ai miyan

phunk Dala us ne sab ghar-bar apne hath se

gar nahin manzur tujh ko wasl ai qatil mere

pher de hulqum par talwar apne hath se

lash meri dekh kar kahne lagga wo tursh-ru

dafn kar denge use sau bar apne hath se

nabz meri dekh kar bola tabib-e-raaz-dan

de ke dil us ne liya aazar apne hath se

ya muinuddin chishti bahr-e-gham mein hun paDa

apne bande ko karo tum par apne hath se

'miran' shah roz-e-hashar ko jam kausar ka miyan

denge tujh ko haidar-e-karrar apne hath se