meri maut se itni wahshat hui

mirī maut se itnī vahshat huī

masīhā ko marne kī hasrat huī

use bekalī merī rāhat se thī

maiñ bekal huā us ko rāhat huī

hai sahrā ye vahshat asar ishq kā

bagūloñ ko bhī jis se vahshat huī

vo lāġhar huuñ us ne kiyā imtihāñ

ayaañ ā.īna meñ na sūrat huī

hai phere hue muñh khaḌī hijr meñ

ajal ko bhī mujh se ye nafrat huī

patañge gire sham.a ko dekh kar

ayaañ shān-e-vahdat se kasrat huī

tirī chaal ne fitna barpā kiyā

qayāmat se paidā qayāmat huī

tire ishq kī qaid vo qaid hai

muqarrar na kuchh jis kī muddat huī

huā gul mirī zindagī kā charāġh

numāyāñ jo shām-e-musībat huī

vo majnūñ kī tasvīr par pūchhnā

tirī kis ke ġham meñ ye sūrat huī

gale aa ke mil lījiye iid hai

zamāna huā ek muddat huī

vo vahshat hamārī thī roz-e-junūñ

ki majnūñ ko bhī jis se vahshat huī

badal jaatī hai ab to karvaT nasīm

tirte ġham meñ zaa.il ye tāqat huī

tujhe naza.a meñ dekh kar ai 'salām'

kahe 'arsh' kyā kaisī ibrat huī

meri maut se itni wahshat hui

masiha ko marne ki hasrat hui

use bekali meri rahat se thi

main bekal hua us ko rahat hui

hai sahra ye wahshat asar ishq ka

bagulon ko bhi jis se wahshat hui

wo laghar hun us ne kiya imtihan

ayan aaina mein na surat hui

hai phere hue munh khaDi hijr mein

ajal ko bhi mujh se ye nafrat hui

patange gire shama ko dekh kar

ayan shan-e-wahdat se kasrat hui

teri chaal ne fitna barpa kiya

qayamat se paida qayamat hui

tere ishq ki qaid wo qaid hai

muqarrar na kuchh jis ki muddat hui

hua gul meri zindagi ka charagh

numayan jo sham-e-musibat hui

wo majnun ki taswir par puchhna

teri kis ke gham mein ye surat hui

gale aa ke mil lijiye id hai

zamana hua ek muddat hui

wo wahshat hamari thi roz-e-junun

ki majnun ko bhi jis se wahshat hui

badal jati hai ab to karwaT nasim

tirte gham mein zail ye taqat hui

tujhe naza mein dekh kar ai 'salam'

kahe 'arsh' kya kaisi ibrat hui