meri tasbih ka ek tar TuTa

mirī tasbīh kā ik taar TuuTā

vo kāfir kā to sab zunnār TuuTā

mirā dil ishq ne kyā toḌ Daalā

dil us kā bhī to āḳhir car TuuTā

shikast ab ishq ne donoñ taraf dī

idhar be-dil udhar dildār TuuTā

bhalā ai ishq tere dam-qadam se

hayā-o-sharm-o-nanag-o-ār TuuTā

kahāñ kī shaikHī-o-kaisī buzurgī

mirā sab dā'vā-o-pindār TuuTā

pilā saaqī mujhe ab bhar ke pyāle

ki har jur.a meñ ik inkār TuuTā

ḳhabar pahuñchī na kyuuñ kar mohtasib ko

mirā ḳhum to sar-e-bāzār TuuTā

maiñ TuuTā haath se us but ke aisā

'turāb' aisā na koī dīn-dār TuuTā

meri tasbih ka ek tar TuTa

wo kafir ka to sab zunnar TuTa

mera dil ishq ne kya toD Dala

dil us ka bhi to aaKHir car TuTa

shikast ab ishq ne donon taraf di

idhar be-dil udhar dildar TuTa

bhala ai ishq tere dam-qadam se

haya-o-sharm-o-nanag-o-ar TuTa

kahan ki shaikHi-o-kaisi buzurgi

mera sab da'wa-o-pindar TuTa

pila saqi mujhe ab bhar ke pyale

ki har jura mein ek inkar TuTa

KHabar pahunchi na kyun kar mohtasib ko

mera KHum to sar-e-bazar TuTa

main TuTa hath se us but ke aisa

'turab' aisa na koi din-dar TuTa