مری تسبیح کا اک تار ٹوٹا

مری تسبیح کا اک تار ٹوٹا

وہ کافر کا تو سب زنار ٹوٹا

مرا دل عشق نے کیا توڑ ڈالا

دل اس کا بھی تو آخر کار ٹوٹا

شکست اب عشق نے دونوں طرف دی

ادھر بے دل ادھر دل دار ٹوٹا

بھلا اے عشق تیرے دم قدم سے

حیا و شرم و ننگ و عار ٹوٹا

کہاں کی شیخی و کیسی بزرگی

مرا سب دعویٰ و پندار ٹوٹا

پلا ساقی مجھے اب بھر کے پیالے

ایک ہر جرعہ میں اک انکار ٹوٹا

خبر پہونچی نہ کیوں کر محتسب کیا

مرا خم تو سر بازار ٹوٹا

میں ٹوٹا ہاتھ سے اس بت کے ایسا

ترابؔ ایسا نہ کوئی دین دار ٹوٹا