meri zaban se tera bayan mushkil hai

mirī zabān se terā bayān mushkil hai

hazār kos kī duurī zabān se dil hai

ta.alliyāñ bhī nahīñ lan-tarāniyāñ bhī nahīñ

rivāyateñ bhī nahīñ haiñ kahāniyāñ bhī nahīñ

marī hayāt kā sarmāya haiñ tirī bāteñ

vo 'urf-e-'ām meñ kahlātī haiñ karāmāteñ

bayān kī haiñ bahut kam karāmateñ maiñ ne

chhupā rakhī haiñ hazāroñ qayāmateñ maiñ ne

dil-o-nazar kī amānat dil-o-nazar meñ hai

kahāñ vo kūcha-o-bāzār-o-rahguzar meñ hai

maqām-e-kHās hai ye rahguzar-e-ām nahīñ

vahāñ hai 'ishq-e-jahāñ kuchh kisī se kaam nahīñ

ḳhud apne aap se kahtā huuñ aap kī bāteñ

ḳhud apne nafs pe bhī pesh kyuuñ karāmateñ

sunī hai nafs ne sam'a-e-qabūl se ye baat

ḳhud apne nafs meñ aa.eñ nazar tirī āyāt

yahī tarīqa-e-isbāt-e-har-karāmat hai

jo ye nahīñ to karāmat nahīñ rivāyat hai

meri zaban se tera bayan mushkil hai

hazar kos ki duri zaban se dil hai

talliyan bhi nahin lan-taraniyan bhi nahin

riwayaten bhi nahin hain kahaniyan bhi nahin

mari hayat ka sarmaya hain teri baaten

wo 'urf-e-'am mein kahlati hain karamaten

bayan ki hain bahut kam karamaten main ne

chhupa rakhi hain hazaron qayamaten main ne

dil-o-nazar ki amanat dil-o-nazar mein hai

kahan wo kucha-o-bazar-o-rahguzar mein hai

maqam-e-kHas hai ye rahguzar-e-am nahin

wahan hai 'ishq-e-jahan kuchh kisi se kaam nahin

KHud apne aap se kahta hun aap ki baaten

KHud apne nafs pe bhi pesh kyun karamaten

suni hai nafs ne sam'a-e-qabul se ye baat

KHud apne nafs mein aaen nazar teri aayat

yahi tariqa-e-isbaat-e-har-karamat hai

jo ye nahin to karamat nahin riwayat hai