baiThe hain shaiKH muft ki botal se Dhaal ke

baiThe haiñ shaiḳh muft kī botal se Dhaal ke

ab kuchh nahīñ ḳhayāl harām-o-halāl ke

furqat bhī hogī go haiñ abhī din visāl ke

āġhāz meñ ḳhayāl haiñ ham ko ma.aal ke

vaa.iz bahār meñ na sunegā koī tirā

rahne de mas.ale ye harām-o-halāl ke

ai iztirāb dil hai taḌapne kā lutf jab

pahuñchā de mujh ko baam pe un ke uchhāl ke

fursat ke haath hai mirā aanā ye kyā kahā

va.ade meñ bhī nikalte haiñ pahlū malāl ke

saaqī ne duḳht-e-raz ko chhupāyā bahut magar

āḳhir ko le ga.e use mai-kash nikāl ke

kaisā jalā ke tuur ko surma banā diyā

sho.ale ġhazab the yaar kī barq-e-jamāl ke

dil ke sivā bhalā hai mire paas aur kyā

ḳhvāhāñ huzūr bhī haiñ ġharīboñ ke maal ke

siina ubhār kar ye gayā sāmne se kaun

pahlū se kaun le gayā dil ko nikāl ke

baiThe hain shaiKH muft ki botal se Dhaal ke

ab kuchh nahin KHayal haram-o-halal ke

furqat bhi hogi go hain abhi din visal ke

aaghaz mein KHayal hain hum ko maal ke

waiz bahaar mein na sunega koi tera

rahne de masale ye haram-o-halal ke

ai iztirab dil hai taDapne ka lutf jab

pahuncha de mujh ko baam pe un ke uchhaal ke

fursat ke hath hai mera aana ye kya kaha

wade mein bhi nikalte hain pahlu malal ke

saqi ne duKHt-e-raz ko chhupaya bahut magar

aaKHir ko le gae use mai-kash nikal ke

kaisa jala ke tur ko surma bana diya

shoale ghazab the yar ki barq-e-jamal ke

dil ke siwa bhala hai mere pas aur kya

KHwahan huzur bhi hain gharibon ke mal ke

sina ubhaar kar ye gaya samne se kaun

pahlu se kaun le gaya dil ko nikal ke