kaun sa wo sar hai jis mein zulf ka sauda nahin

kaun sā vo sar hai jis meñ zulf kā saudā nahīñ

kaun sī vo bazm hai jis meñ tirā charchā nahīñ

aur kuchh armān dil meñ jān-e-jāñ uThtā nahīñ

ek hasrat vasl kī hai aap se parvā nahīñ

vaqt-e-āḳhir dekh kar vo mujh ko farmāne lage

mehmāñ kuchh der kā hai us kā haal achchhā nahīñ

vaqt-e-ārā.ish jo kī ā.īna par us ne nazar

husn ḳhud kahne lagā is se hasīñ dekhā nahīñ

chashm-e-nargis ban ga.ī hai ishtiyāq-e-dīd meñ

kaun kahtā hai ki gulshan meñ tirā charchā nahīñ

ho gayā qurbān ik āshiq chalo fursat huī

is qadar kyuuñ muztarib ho kyā koī martā nahīñ

haaye vo jhuñjhlā ke kahnā vasl kī shab yaar kā

chheḌnā is tarah ham ko dekhiye achchhā nahīñ

aaj kyā jaatī huī duniyā nazar aa.ī tumheñ

yuuñ to varna pyaar se mujh ko kabhī pūchhā nahīñ

kis tarah āḳhir taḌap kar rah gayā armān-e-vasl

o dil-e-āfat-zada tuune bhī kuchh dekhā nahīñ

vahm hai shak hai gumāñ hai baal se bārīk hai

is se behtar aur mazmūn-e-kamar miltā nahīñ

hai ġhanīmat aap kā dīdār hī hotā rahe

yuuñ to mere dil meñ ai jān-e-jahāñ kyā-kyā nahīñ

ek bosa vasl kī shab de ke bole naaz se

mere hī sar kī qasam ab aur kuchh kahnā nahīñ

ḳhānumāñ barbād dil yaad aa gayā yādash ba-ḳhair

ik zamāna ho gayā jab se use dekhā nahīñ

vasl kī shab tevrī badle hue baiThe haiñ vo

o dil-e-rāhat-talab is vaqt maiñ Dartā nahīñ

āfrīñ sad āfrīñ aur be-muravvat be-vafā

naza.a ke a.alam meñ bhī tū dekhne aayā nahīñ

chatr-e-shāhī kuchh nahīñ zill-e-humā bhī kuchh nahīñ

sāya-e-dīvār se behtar koī saaya nahīñ

ho ga.e behosh muusā bas yahī thā shauq-e-dīd

ik nazar bhar ke bhī jalva yaar kā dekhā nahīñ

tū vo yūsuf hai ki yūsuf ko bhī hai armān-e-dīd

misr ke bāzār meñ koī hasīñ tujh sā nahīñ

zulf ke phande meñ āḳhir ḳhud-baḳhud jā kar phañsā

laakh samjhāyā dil-e-be-tāb ne maanā nahīñ

kūcha-e-qātil meñ jā kar haath se rakkheñ tujhe

o dil-e-betāb hamne isliye paalā nahīñ

ye tumhāre husn roz-afzūñ kī hai a.alam meñ dhuum

husn-e-yūsuf kā koī ab naam tak letā nahīñ

rahm aa.egā kabhī to tum ko mere haal par

ḳhud samajh jāoge ik din maiñ to kuchh kahtā nahīñ

bazm meñ duzdīda nazreñ hamne Dālīñ yaar par

dekhne kī tarah jī bhar ke unheñ dekhā nahīñ

is tarah hai hasrat-e-dīdār-e-jānāñ aaj kal

dīda-e-mushtāq ne goyā kabhī dekhā nahīñ

aish-o-ishrat vasl-o-rāhat sab ḳhushī meñ haiñ sharīk

be-kasī meñ aah koī pūchhne vaalā nahīñ

kyuuñ gul-e-āriz pe tum ne zulf bikhrā.ī nahīñ

chashma-e-ḳhurshīd meñ kyuuñ saañp lahrāyā nahīñ

bazm meñ zaanū dabā.e yaar kā baiThe haiñ ġhair

al-madad ai zabt ye hamne kabhī dekhā nahīñ

kuchh dinoñ hasrat rahī armān kuchh din rah gayā

ḳhāna-e-dil ko bhī ḳhālī aaj tak paaya nahīñ

us kī be-tābī se shohrat hai tumhāre husn kī

ye vahī 'mannan' hai jis ko tum ne pahchānā nahīñ

kaun sa wo sar hai jis mein zulf ka sauda nahin

kaun si wo bazm hai jis mein tera charcha nahin

aur kuchh arman dil mein jaan-e-jaan uThta nahin

ek hasrat wasl ki hai aap se parwa nahin

waqt-e-aKHir dekh kar wo mujh ko farmane lage

mehman kuchh der ka hai us ka haal achchha nahin

waqt-e-araish jo ki aaina par us ne nazar

husn KHud kahne laga is se hasin dekha nahin

chashm-e-nargis ban gai hai ishtiyaq-e-did mein

kaun kahta hai ki gulshan mein tera charcha nahin

ho gaya qurban ek aashiq chalo fursat hui

is qadar kyun muztarib ho kya koi marta nahin

haye wo jhunjhla ke kahna wasl ki shab yar ka

chheDna is tarah hum ko dekhiye achchha nahin

aaj kya jati hui duniya nazar aai tumhein

yun to warna pyar se mujh ko kabhi puchha nahin

kis tarah aaKHir taDap kar rah gaya arman-e-wasl

o dil-e-afat-zada tune bhi kuchh dekha nahin

wahm hai shak hai guman hai baal se barik hai

is se behtar aur mazmun-e-kamar milta nahin

hai ghanimat aap ka didar hi hota rahe

yun to mere dil mein ai jaan-e-jahan kya-kya nahin

ek bosa wasl ki shab de ke bole naz se

mere hi sar ki qasam ab aur kuchh kahna nahin

KHanuman barbaad dil yaad aa gaya yaadash ba-KHair

ek zamana ho gaya jab se use dekha nahin

wasl ki shab tewri badle hue baiThe hain wo

o dil-e-rahat-talab is waqt main Darta nahin

aafrin sad aafrin aur be-murawwat be-wafa

naza ke aalam mein bhi tu dekhne aaya nahin

chatr-e-shahi kuchh nahin zill-e-huma bhi kuchh nahin

saya-e-diwar se behtar koi saya nahin

ho gae behosh musa bas yahi tha shauq-e-did

ek nazar bhar ke bhi jalwa yar ka dekha nahin

tu wo yusuf hai ki yusuf ko bhi hai arman-e-did

misr ke bazar mein koi hasin tujh sa nahin

zulf ke phande mein aaKHir KHud-baKHud ja kar phansa

lakh samjhaya dil-e-be-tab ne mana nahin

kucha-e-qatil mein ja kar hath se rakkhen tujhe

o dil-e-betab hamne isliye pala nahin

ye tumhaare husn roz-afzun ki hai aalam mein dhum

husn-e-yusuf ka koi ab nam tak leta nahin

rahm aaega kabhi to tum ko mere haal par

KHud samajh jaoge ek din main to kuchh kahta nahin

bazm mein duzdida nazren hamne Dalin yar par

dekhne ki tarah ji bhar ke unhen dekha nahin

is tarah hai hasrat-e-didar-e-jaanan aaj kal

dida-e-mushtaq ne goya kabhi dekha nahin

aish-o-ishrat wasl-o-rahat sab KHushi mein hain sharik

be-kasi mein aah koi puchhne wala nahin

kyun gul-e-ariz pe tum ne zulf bikhrai nahīñ

chashma-e-KHurshid mein kyun sanp lahraya nahin

bazm mein zanu dabae yar ka baiThe hain ghair

al-madad ai zabt ye hamne kabhi dekha nahin

kuchh dinon hasrat rahi arman kuchh din rah gaya

KHana-e-dil ko bhi KHali aaj tak paya nahin

us ki be-tabi se shohrat hai tumhaare husn ki

ye wahi 'mannan' hai jis ko tum ne pahchana nahin