chashm-e-nam yun kucha-e-jaanan mein hum har dam rahe

chashm-e-nam yuuñ kūcha-e-jānāñ meñ ham har dam rahe

jis tarah bāġh-e-jahāñ meñ qatra-e-shabnam rahe

rote-rote hijr meñ kyā jaane kyā yaad aa gayā

kuchh mizha par qatrahā-e-ashk aakar tham rahe

ḳhūn-e-nāhaq kī shahādat ke liye kaafī hai ye

dāman-e-qātil pe jo dhabbe lahū ke jam rahe

sāmne mere hī vo jaate haiñ bazm-e-ġhair meñ

al-madad ai zabt mujh ko kab tak us kā ġham rahe

aaj is andāz se vo aa.e qatl-e-ām ko

tevrī badlī rahī rūThe rahe barham rahe

hashr ke din imtihāñ pesh-e-ḳhudā donoñ kā hai

lutf hai unkī jafā merī vafā se kam rahe

chashm-e-nam yun kucha-e-jaanan mein hum har dam rahe

jis tarah bagh-e-jahan mein qatra-e-shabnam rahe

rote-rote hijr mein kya jaane kya yaad aa gaya

kuchh mizha par qatraha-e-ashk aakar tham rahe

KHun-e-nahaq ki shahadat ke liye kafi hai ye

daman-e-qatil pe jo dhabbe lahu ke jam rahe

samne mere hi wo jate hain bazm-e-ghair mein

al-madad ai zabt mujh ko kab tak us ka gham rahe

aaj is andaz se wo aae qatl-e-am ko

tewri badli rahi ruThe rahe barham rahe

hashr ke din imtihan pesh-e-KHuda donon ka hai

lutf hai unki jafa meri wafa se kam rahe