miT gaya dil hum tamasha-e-fana dekha kiye

miT gayā dil ham tamāshā-e-fanā dekhā kiye

kar hī kyā sakte the jo kuchh bhī huā dekhā kiye

tum na aa.e aur tadbīr-e-junūñ zaa.e’ huī

ham tasavvur meñ tumheñ aatā huā dekhā kiye

jazba-e-dil kī magar tāsīr ulTī ho ga.ī

ham tumhārā aur tum muñh ġhair kā dekhā kiye

baa.az din aisā hī ho jaatā hai merā haal kuchh

jaane kyā kartā rahā maiñ aap kyā dekhā kiye

aisī kyā merī tamannā.eñ ta.ajjub-ḳhez thiiñ

maiñ bayāñ kartā rahā tum muñh mirā dekhā kiye

maiñ ne pūchhā ġhair ke ghar aap kyā karte rahe

hañs ke farmāyā tumhārā rāstā dekhā kiye

terī is vahshat kī ai 'maikash' davā bhī hai kahīñ

ik na ik pur-ġhash tujhe mard-e-ḳhudā dekhā kiye

miT gaya dil hum tamasha-e-fana dekha kiye

kar hi kya sakte the jo kuchh bhi hua dekha kiye

tum na aae aur tadbir-e-junun zae’ hui

hum tasawwur mein tumhein aata hua dekha kiye

jazba-e-dil ki magar tasir ulTi ho gai

hum tumhaara aur tum munh ghair ka dekha kiye

baaz din aisa hi ho jata hai mera haal kuchh

jaane kya karta raha main aap kya dekha kiye

aisi kya meri tamannaen tajjub-KHez thin

main bayan karta raha tum munh mera dekha kiye

main ne puchha ghair ke ghar aap kya karte rahe

hans ke farmaya tumhaara rasta dekha kiye

teri is wahshat ki ai 'maikash' dawa bhi hai kahin

ek na ek pur-ghash tujhe mard-e-KHuda dekha kiye