مٹ گیا دل ہم تماشائے فنا دیکھا کیے

مٹ گیا دل ہم تماشائے فنا دیکھا کیے

کر ہی کیا سکتے تھے جو کچھ بھی ہوا دیکھا کیے

تم نہ آئے اور تدبیر جنوں ضائع ہوئی

ہم تصور میں تمہیں آتا ہوا دیکھا کیے

جذبۂ دل کی مگر تاثیر الٹی ہو گئی

ہم تمہارا اور تم منہ غیر کا دیکھا کیے

بعض دن ایسا ہی ہو جاتا ہے میرا حال کچھ

جانے کیا کرتا رہا میں آپ کیا دیکھا کیے

ایسی کیا میری تمنائیں تعجب خیز تھیں

میں بیاں کرتا رہا تم منہ مرا دیکھا کیے

میں نے پوچھا غیر کے گھر آپ کیا کرتے رہے

ہنس کے فرمایا تمہارا راستا دیکھا کیے

تیری اس وحشت کی اے میکشؔ دوا بھی ہے کہیں

اک نہ اک پر غش تجھے مرد خدا دیکھا کیے