mohabbat jaan-bazi hai laga le jis ka ji chahe

mohabbat jān-bāzī hai lagā le jis kā jī chāhe

ye beḌā hai tabāhī kā uThā le jis kā jī chāhe

ye sher-e-ishq sotā hai jagā le jis kā chāhe

pakaḌ shamshīr zillat kī chalā le jis kā jī chāhe

mohabbat ham kareñ us se vo kartā hai sitam ham par

sitamgar se ye dil apnā milā le jis kā jī chāhe

na chhūTegā kabhī hargiz phañsā jo dām-e-ulfat meñ

dil apnā zulf-e-dilbar se phañsā le jis kā jī chāhe

sivā qismat ke duniyā meñ nahīñ kuchh mutlaqan miltā

vagarna zor kar ke aazmā le jis kā jī chāhe

makāñ haiñ ḳhūb-tar saare jo vasl-e-ḳhūb-rū hove

mile mahbūb jis jā gā biThā le jis kā jī chāhe

koī masjid banātā hai koī but-ḳhāna duniyā meñ

makāñ bante haiñ daulat se banā le jis kā jī chāhe

mohabbat aur mehnat kī hai sūrat ek sī pyāre

balā-e-āsmānī hai lagā le jis kā jī chāhe

nigāh-e-yār hai tirchhī liye shamshīr aatā hai

ye sar apnā ḳhushāmad se kaTā le jis kā jī chāhe

jo marne se muue pahle unheñ kyā ḳhauf dozaḳh kā

dil apnā nār-e-hijrat se jalā le jis kā jī chāhe

sharāb-e-ma.arifat 'ārif' ba-jām-e-sidq piitā hai

nahīñ haTtā haTāne se haTā le jis kā jī chāhe

mohabbat jaan-bazi hai laga le jis ka ji chahe

ye beDa hai tabahi ka uTha le jis ka ji chahe

ye sher-e-ishq sota hai jaga le jis ka chahe

pakaD shamshir zillat ki chala le jis ka ji chahe

mohabbat hum karen us se wo karta hai sitam hum par

sitamgar se ye dil apna mila le jis ka ji chahe

na chhuTega kabhi hargiz phansa jo dam-e-ulfat mein

dil apna zulf-e-dilbar se phansa le jis ka ji chahe

siwa qismat ke duniya mein nahin kuchh mutlaqan milta

wagarna zor kar ke aazma le jis ka ji chahe

makan hain KHub-tar sare jo wasl-e-KHub-ru howe

mile mahbub jis ja ga biTha le jis ka ji chahe

koi masjid banata hai koi but-KHana duniya mein

makan bante hain daulat se bana le jis ka ji chahe

mohabbat aur mehnat ki hai surat ek si pyare

bala-e-asmani hai laga le jis ka ji chahe

nigah-e-yar hai tirchhi liye shamshir aata hai

ye sar apna KHushamad se kaTa le jis ka ji chahe

jo marne se mue pahle unhen kya KHauf dozaKH ka

dil apna nar-e-hijrat se jala le jis ka ji chahe

sharab-e-marifat 'arif' ba-jam-e-sidq pita hai

nahin haTta haTane se haTa le jis ka ji chahe