محبت جان بازی ہے لگا لے جس کا جی چاہے

محبت جان بازی ہے لگا لے جس کا جی چاہے

یہ بیڑا ہے تباہی کا اٹھا لے جس کا جی چاہے

یہ شیر عشق سوتا ہے جگا لے جس کا چاہے

پکڑ شمشیر ذلت کی چلا لے جس کا جی چاہے

محبت ہم کریں اس سے وہ کرتا ہے ستم ہم پر

ستم گر سے یہ دل اپنا ملا لے جس کا جی چاہے

نہ چھوٹے گا کبھی ہرگز پھنسا جو دام الفت میں

دل اپنا زلف دلبر سے پھنسا لے جس کا جی چاہے

سوا قسمت کے دنیا میں نہیں کچھ مطلقاً ملتا

وگرنہ زور کر کے آزما لے جس کا جی چاہے

مکاں ہیں خوب تر سارے جو وصل خوبرو ہووے

ملے محبوب جس جا گا بٹھا لے جس کا جی چاہے

کوئی مسجد بناتا ہے کوئی بت خانہ دنیا میں

مکاں بنتے ہیں دولت سے بنا لے جس کا جی چاہے

محبت اور محنت کی ہے صورت ایک سی پیارے

بلائے آسمانی ہے لگا لے جس کا جی چاہے

نگاہ یار ہے ترچھی لیے شمشیر آتا ہے

یہ سر اپنا خوشامد سے کٹا لے جس کا جی چاہے

جو مرنے سے موئے پہلے انہیں کیا خوف دوزخ کا

دل اپنا نار ہجرت سے جلا لے جس کا جی چاہے

شراب معرفت عارفؔ بجام صدق پیتا ہے

نہیں ہٹتا ہٹانے سے ہٹا لے جس کا جی چاہے