mohabbat ko meri gharaz tum se kya hai

mohabbat ko merī ġharaz tum se kyā hai

tabī'at kā dil kī yahī muqtazā hai

ḳhudā jaane dil ko mire kyā huā hai

tumhīñ se ḳhafā hai tumhīñ par fidā hai

maiñ ḳhud mā’nī-e-husn huuñ ai sitam-gar

magar kuchh judā.ī meñ terī mazā hai

tumhārā sitam 'ain merī mohabbat

kisī par kiyā tum ne mujh par huā hai

junūñ merā donoñ jahāñ meñ musallam

tumheñ bhī magar chheḌne kā mazā hai

maiñ is daur-e-hastī meñ vo dā.ira huuñ

ki har intihā par mirī ibtidā hai

na kuchh kah sakā maiñ na kuchh vo hī samjhe

bahut der sochā ki kyā mudda'ā hai

mujhe hone ke haiñ to laakh shikve

kyā tum se shikvā ye apnā gilā hai

zarā maiñ ne dekhā ki vo chauñk uTThe

tuf ai jazb-e-dil ye bhī kyā mashġhalā hai

hai mardūd dair aur kā'be se fāriġh

na momin na kāfir ye dil kyā balā hai

maiñ har falsafe kī haqīqat huuñ 'maikash'

mire sāmne hech har falsafa hai

mohabbat ko meri gharaz tum se kya hai

tabi'at ka dil ki yahi muqtaza hai

KHuda jaane dil ko mere kya hua hai

tumhin se KHafa hai tumhin par fida hai

main KHud ma’ni-e-husn hun ai sitam-gar

magar kuchh judai mein teri maza hai

tumhaara sitam 'ain meri mohabbat

kisi par kiya tum ne mujh par hua hai

junun mera donon jahan mein musallam

tumhein bhi magar chheDne ka maza hai

main is daur-e-hasti mein wo daira hun

ki har intiha par meri ibtida hai

na kuchh kah saka main na kuchh wo hi samjhe

bahut der socha ki kya mudda'a hai

mujhe hone ke hain to lakh shikwe

kya tum se shikwa ye apna gila hai

zara main ne dekha ki wo chaunk uTThe

tuf ai jazb-e-dil ye bhi kya mashghala hai

hai mardud dair aur ka'be se farigh

na momin na kafir ye dil kya bala hai

main har falsafe ki haqiqat hun 'maikash'

mere samne hech har falsafa hai