hujum-e-be-kHudi-e-ishq ko KHuda samjhe

hujūm-e-be-kHudī-e-ishq ko ḳhudā samjhe

vo aur mujh se kaheñ mujh ko pyaar karatā jā

bagūle marqad-e-āshiq ke sab se kahte haiñ

jo aa gayā hai tavāf-e-mazār karatā jā

ye dil ke daaġh haiñ milte haiñ jis ko milte haiñ

sipās-e-ne.amat-e-parvardigār karatā jā

ishāra phirtī huī putliyāñ ye kartī haiñ

ki mahv-e-dahr ke naqsh-o-nigār karatā jā

kahūñgā bā'd-e-qiyāmat bhī nāz-e-jānāñ se

kuchh aur dil ko mire be-qarār karatā jā

abhī chaman hai qafas to abhī qafas hai chaman

nazzāra-e-chaman rozgār karatā jā

naqāb āriz-e-rañgīñ haTā ke ai dilbar

jahāñ ke ban ko hamesha bahār karatā jā

samajhne paa.e kabhī āsmāñ na ai 'beḳhud'

ye jitnā jabr kare inkisār karatā jā

hujum-e-be-kHudi-e-ishq ko KHuda samjhe

wo aur mujh se kahen mujh ko pyar karata ja

bagule marqad-e-ashiq ke sab se kahte hain

jo aa gaya hai tawaf-e-mazar karata ja

ye dil ke dagh hain milte hain jis ko milte hain

sipas-e-neamat-e-parwardigar karata ja

ishaara phirti hui putliyan ye karti hain

ki mahw-e-dahr ke naqsh-o-nigar karata ja

kahunga ba'd-e-qiyamat bhi naz-e-jaanan se

kuchh aur dil ko mere be-qarar karata ja

abhi chaman hai qafas to abhi qafas hai chaman

nazzara-e-chaman rozgar karata ja

naqab aariz-e-rangin haTa ke ai dilbar

jahan ke ban ko hamesha bahaar karata ja

samajhne pae kabhi aasman na ai 'beKHud'

ye jitna jabr kare inkisar karata ja