hasinon mein wo gul sab se juda hai apni rangat ka

hasīnoñ meñ vo gul sab se judā hai apnī rañgat kā

adā kā naaz kā ishva kā shoḳhī kā sharārat kā

qayāmat tak namūna hai tire andāz-e-qāmat kā

qadam ko chūmtā phirtā hai har fitna qayāmat kā

nigāheñ garm haiñ ḳhanjar-ba-kaf haiñ aur ye kahte haiñ

vo aa.e sāmne armān ho jis ko shahādat kā

unhoñ ne jaan dī aur tū ne miTTī bhī na dī un ko

diyā kyā ḳhūñ-bahā zālim shahīdān-e-mohabbat kā

pas-e-murdan to mujh ko qabr meñ rāhat se rahne do

tumhārī Thokaroñ se uḌtā hai ḳhāka qayāmat kā

kahīñ kā bhī na rakhā yaar kab kab le liye badle

milā kar ḳhaak meñ baaqī nishāñ chhoḌā na turbat kā

milā ab ke to pūchhūñgā ki ai ā.īna-rū ham se

ye be-parvā.iyāñ kyuuñ haiñ sabab kyā hai kudūrat kā

vafā.eñ yaad karke vo bahā jaate haiñ rose aañsū

rahegā hashr tak sarsabz sabza merī turbat kā

hare kapḌe pahan kar phir na jaanā yaar gulshan meñ

gulū-e-shāḳh-e-gul se ḳhuun Tapkegā shahādat kā

Dubo kar chāh-e-ġham meñ kah gayā vo yūsuf-e-sānī

burī hotī hai chāhat phir na lenā naam chāhat kā

kahā us ne ki 'akbar' kis ke āshiq ho kahā maiñ ne

tumhārī pyārī aadat kā tumhārī bholī sūrat kā

hasinon mein wo gul sab se juda hai apni rangat ka

ada ka naz ka ishwa ka shoKHi ka shararat ka

qayamat tak namuna hai tere andaz-e-qamat ka

qadam ko chumta phirta hai har fitna qayamat ka

nigahen garm hain KHanjar-ba-kaf hain aur ye kahte hain

wo aae samne arman ho jis ko shahadat ka

unhon ne jaan di aur tu ne miTTi bhi na di un ko

diya kya KHun-baha zalim shahidan-e-mohabbat ka

pas-e-murdan to mujh ko qabr mein rahat se rahne do

tumhaari Thokaron se uDta hai KHaka qayamat ka

kahin ka bhi na rakha yar kab kab le liye badle

mila kar KHak mein baqi nishan chhoDa na turbat ka

mila ab ke to puchhunga ki ai aaina-ru hum se

ye be-parwaiyan kyun hain sabab kya hai kudurat ka

wafaen yaad karke wo baha jate hain rose aansu

rahega hashr tak sarsabz sabza meri turbat ka

hare kapDe pahan kar phir na jaana yar gulshan mein

gulu-e-shaKH-e-gul se KHun Tapkega shahadat ka

Dubo kar chah-e-gham mein kah gaya wo yusuf-e-sani

buri hoti hai chahat phir na lena nam chahat ka

kaha us ne ki 'akbar' kis ke aashiq ho kaha main ne

tumhaari pyari aadat ka tumhaari bholi surat ka