ghazab hai tera ek nazar dekh lena

ġhazab hai tirā ik nazar dekh lenā

qayāmat na ho fitna-gar dekh lenā

sambhālo to tum apnī teġh-e-adā ko

mirī jāñ-dehī ke hunar dekh lenā

mirā kushta honā tirī chashm-poshī

jalānā mirā ik nazar dekh lenā

yahī sar-kashī hai agar terī zālim

kaTā deñge ham apnā sar dekh lenā

hai bārīk tār-e-nazar se ziyāda

dikhā.ī na degī kamar dekh lenā

judā.ī meñ lab ḳhushk haiñ chashm tar haiñ

idhar bhī shah-e-bahr-o-bar dekh lenā

hai ye taur āñkhoñ kā furqat meñ terī

idhar dekh lenā udhar dekh lenā

maiñ chhuT jā.uñgā bāz-purs-e-amal se

ināyat se tum ik nazar dekh lenā

biThā.eñge āñkhoñ meñ dil meñ tujhe ham

pasand aa.e jo tujh ko ghar dekh lenā

jalā kar tū ai sham.a ik dil-jale ko

jalegī sadā tā-sahar dekh lenā

zamīñ par paTak degī ai charḳh tujh ko

ye āh-e-sarī.a-ul-asar dekh lenā

na pūchho pata 'akbar'-e-ġham-zada kā

kahīñ hogā thāme jigar dekh lenā

ghazab hai tera ek nazar dekh lena

qayamat na ho fitna-gar dekh lena

sambhaalo to tum apni tegh-e-ada ko

meri jaan-dehi ke hunar dekh lena

mera kushta hona teri chashm-poshi

jalana mera ek nazar dekh lena

yahi sar-kashi hai agar teri zalim

kaTa denge hum apna sar dekh lena

hai barik tar-e-nazar se ziyaada

dikhai na degi kamar dekh lena

judai mein lab KHushk hain chashm tar hain

idhar bhi shah-e-bahr-o-bar dekh lena

hai ye taur aankhon ka furqat mein teri

idhar dekh lena udhar dekh lena

main chhuT jaunga baz-purs-e-amal se

inayat se tum ek nazar dekh lena

biThaenge aankhon mein dil mein tujhe hum

pasand aae jo tujh ko ghar dekh lena

jala kar tu ai shama ek dil-jale ko

jalegi sada ta-sahar dekh lena

zamin par paTak degi ai charKH tujh ko

ye aah-e-saria-ul-asar dekh lena

na puchho pata 'akbar'-e-gham-zada ka

kahin hoga thame jigar dekh lena