sar-e-maqtal jo le kar tegh wo qatil nikalta hai

sar-e-maqtal jo le kar teġh vo qātil nikaltā hai

kisī kā ḳhuun hotā hai koī ghāyal nikaltā hai

kahāñ jaate ho bālīñ se chale jaanā zarā Thahro

ki dam ke saath armān-e-dil-e-bismil nikaltā hai

jhukī ġham kī ghaTā jaane se tere ashk jaarī haiñ

kahāñ tū aise meñh meñ ai mah-e-kāmil nikaltā hai

chaman meñ tū saman meñ tū dahan meñ tū suḳhan meñ tū

kahīñ āsān hotā hai kahīñ mushkil nikaltā hai

baheñge ḳhuun kis kis ke qazā aa.ī hai kis kis kī

ilāhī ḳhair ḳhanjar le ke phir qātil nikaltā hai

koī un chāhne vāloñ kī āḳhir intihā bhī hai

jise dekho tumhāre husn par maa.il nikaltā hai

sitam ko chhoḌ bad achchhā burā badnām duniyā meñ

jafā ke saath terā naam ai qātil nikaltā hai

mirī hasrat na rah jaaye mirā armāñ na ruk jaaye

qamar haT baam par merā mah-e-kāmil nikaltā hai

maiñ Dar jaatā huuñ goyā vasl kī shab din nikal aayā

jo burqā se sañvar kar vo mah-e-kāmil nikaltā hai

kahāñ hai tū kahīñ hai tū nihāñ hai tū nahīñ hai tū

judā har rañg se har rañg meñ shāmil nikaltā hai

nazar thī yā koī mīThī chhurī thī o but-e-qātil

zabāñ ko chāTtā zaḳhmoñ ko har ghāyal nikaltā hai

tire aage huā hai qāfiya tañg ahl-e-ma.anī kā

tū 'akbar' har ġhazal kī bahr meñ kāmil nikaltā hai

sar-e-maqtal jo le kar tegh wo qatil nikalta hai

kisi ka KHun hota hai koi ghayal nikalta hai

kahan jate ho baalin se chale jaana zara Thahro

ki dam ke sath arman-e-dil-e-bismil nikalta hai

jhuki gham ki ghaTa jaane se tere ashk jari hain

kahan tu aise meinh mein ai mah-e-kaamil nikalta hai

chaman mein tu saman mein tu dahan mein tu suKHan mein tu

kahin aasan hota hai kahin mushkil nikalta hai

bahenge KHun kis kis ke qaza aai hai kis kis ki

ilahi KHair KHanjar le ke phir qatil nikalta hai

koi un chahne walon ki aaKHir intiha bhi hai

jise dekho tumhaare husn par mail nikalta hai

sitam ko chhoD bad achchha bura badnam duniya mein

jafa ke sath tera nam ai qatil nikalta hai

meri hasrat na rah jaye mera arman na ruk jaye

qamar haT baam par mera mah-e-kaamil nikalta hai

main Dar jata hun goya wasl ki shab din nikal aaya

jo burqa se sanwar kar wo mah-e-kaamil nikalta hai

kahan hai tu kahin hai tu nihan hai tu nahin hai tu

juda har rang se har rang mein shamil nikalta hai

nazar thi ya koi miThi chhuri thi o but-e-qatil

zaban ko chaTta zaKHmon ko har ghayal nikalta hai

tere aage hua hai qafiya tang ahl-e-mani ka

tu 'akbar' har ghazal ki bahr mein kaamil nikalta hai