kahun kya ki gulshan-e-dahr mein wo ajab karishme dikha gae

kahūñ kyā ki gulshan-e-dahr meñ vo ajab karishme dikhā ga.e

kahīñ āshiqoñ ko miTā ga.e kahīñ lan-tarānī sunā ga.e

kabhī dair-o-ka.aba batā diyā kabhī lā-makāñ kā patā diyā

jo ḳhudī ko ham ne miTā diyā to vo apne-āp meñ pā ga.e

kahīñ andalīb-e-shumār meñ kahīñ gul haiñ fasl-e-bahār meñ

kahīñ nuur meñ kahīñ naar meñ vo hazār rañg dikhā ga.e

jo ḳhudā kahūñ to ḳhudā nahīñ jo judā kahūñ to judā nahīñ

koī nukta ham se chhupā nahīñ hamīñ pech-o-tāb meñ aa ga.e

hameñ justujū rahī jā-ba-jā kahīñ terā hī na milā patā

kabhī kāshī jā ke talāsh kī kabhī darshanoñ ko gayā ga.e

kahīñ īn-o-āñ kahīñ shoḳhiyāñ kabhī narmiyāñ kabhī garmiyāñ

kabhī ban ga.e kabhī tan ga.e kabhī chal diye kabhī aa ga.e

hai ye āshiqoñ kī fanā baqā kabhī mar gayā kabhī jī uThā

kahīñ tirchhī nazroñ ne khā liyā kahīñ ishve aa ke jalā ga.e

kahīñ husn ban ke qubūl meñ kahīñ rañg ban ke vo phuul meñ

kahīñ nuur ban ke rasūl meñ vo jamāl apnā dikhā ga.e

tirī jhūñTī-kūñTī bachī-kuchhī jo milī to 'akbar-e-vārsī'

vo bhare nasha kī tarañg meñ ki kahīñ kahīñ kī sunā ga.e

kahun kya ki gulshan-e-dahr mein wo ajab karishme dikha gae

kahin aashiqon ko miTa gae kahin lan-tarani suna gae

kabhi dair-o-kaba bata diya kabhi la-makan ka pata diya

jo KHudi ko hum ne miTa diya to wo apne-ap mein pa gae

kahin andalib-e-shumar mein kahin gul hain fasl-e-bahaar mein

kahin nur mein kahin nar mein wo hazar rang dikha gae

jo KHuda kahun to KHuda nahin jo juda kahun to juda nahin

koi nukta hum se chhupa nahin hamin pech-o-tab mein aa gae

hamein justuju rahi ja-ba-ja kahin tera hi na mila pata

kabhi kashi ja ke talash ki kabhi darshanon ko gaya gae

kahin in-o-an kahin shoKHiyan kabhi narmiyan kabhi garmiyan

kabhi ban gae kabhi tan gae kabhi chal diye kabhi aa gae

hai ye aashiqon ki fana baqa kabhi mar gaya kabhi ji uTha

kahin tirchhi nazron ne kha liya kahin ishwe aa ke jala gae

kahin husn ban ke qubul mein kahin rang ban ke wo phul mein

kahin nur ban ke rasul mein wo jamal apna dikha gae

teri jhunTi-kunTi bachi-kuchhi jo mili to 'akbar-e-warsi'

wo bhare nasha ki tarang mein ki kahin kahin ki suna gae