saqi hai mera wo shah-e-zaman subhan-allah subhan-allah

saaqī hai mirā vo shāh-e-zaman sub.hān-allāh sub.hān-allāh

kyā ḳhuub khilā hai dil kā chaman sub.hān-allāh sub.hān-allāh

jalve se tire hai kab ḳhālī phal phuul phalī patta Daalī

hai rañg tirā gulshan gulshan sub.hān-allāh sub.hān-allāh

nazdīk haiñ ye yā duur haiñ ye har vaqt nashe meñ chuur haiñ ye

mastoñ kī hai saaqī se lagan sub.hān-allāh sub.hān-allāh

gar dil meñ chashm-e-bīnā ho but-ḳhāna ho yā ka.aba ho

ghar ghar meñ haiñ us ke darshan sub.hān-allāh sub.hān-allāh

va-hova-ma.akum kī pukār aa.ī ahdum-minkum kī bahār aa.ī

va-anā-basharun kī uThī chilman sub.hān-allāh sub.hān-allāh

kyuuñ dhuum na merī ho har-sū āñkhoñ meñ basā hai tū hī tū

fī-anfosekum kā ye joban sub.hān-allāh sub.hān-allāh

jab zaat ke saath sifāt huī vahdat kasrat kī barāt huī

haiñ aap hī dūlhā aap dūlhan sub.hān-allāh sub.hān-allāh

vo pichhlī bāteñ duur kaaro aage aanā manzūr kaaro

ab mujh meñ dekho apnī phaban sub.hān-allāh sub.hān-allāh

jis vaqt guru ne dī daarū har roñgTā bolā allāh-hū

anhad se rañg diyā tan-man sub.hān-allāh sub.hān-allāh

bahrūp bharūñ deve jā۔ūñ ye sab kī zabāñ se kahlā.ūñ

vo aa.ī 'vāris' kī jogan sub.hān-allāh sub.hān-allāh

ābād rahe ye mai-ḳhāna 'akbar' ko pilā vo paimāna

ho marte dam tak ye hī suḳhan sub.hān-allāh sub.hān-allāh

saqi hai mera wo shah-e-zaman subhan-allah subhan-allah

kya KHub khila hai dil ka chaman subhan-allah subhan-allah

jalwe se tere hai kab KHali phal phul phali patta Dali

hai rang tera gulshan gulshan subhan-allah subhan-allah

nazdik hain ye ya dur hain ye har waqt nashe mein chur hain ye

maston ki hai saqi se lagan subhan-allah subhan-allah

gar dil mein chashm-e-bina ho but-KHana ho ya kaba ho

ghar ghar mein hain us ke darshan subhan-allah subhan-allah

wa-howa-makum ki pukar aai ahdum-minkum ki bahaar aai

wa-ana-basharun ki uThi chilman subhan-allah subhan-allah

kyun dhum na meri ho har-su aankhon mein basa hai tu hi tu

fi-anfosekum ka ye joban subhan-allah subhan-allah

jab zat ke sath sifat hui wahdat kasrat ki baraat hui

hain aap hi dulha aap dulhan subhan-allah subhan-allah

wo pichhli baaten dur karo aage aana manzur karo

ab mujh mein dekho apni phaban subhan-allah subhan-allah

jis waqt guru ne di daru har rongTa bola allah-hu

anhad se rang diya tan-man subhan-allah subhan-allah

bahrup bharun dewe ja۔un ye sab ki zaban se kahlaun

wo aai 'waris' ki jogan subhan-allah subhan-allah

aabaad rahe ye mai-KHana 'akbar' ko pila wo paimana

ho marte dam tak ye hi suKHan subhan-allah subhan-allah