fart-e-gham-o-hirman mein bhi yak-guna KHushi hai

fart-e-ġham-o-hirmāñ meñ bhī yak-gūna ḳhushī hai

nākāmī paiham hai magar zinda-dilī hai

afsurda huuñ maiñ aap ke hoñToñ pe hañsī hai

shāyad abhī takmīl-e-mohabbat meñ kamī hai

dil sho.ala-ba-dāmāñ hai aur ashkoñ kī jhaḌī hai

barsāt kā mausam hai magar aag lagī hai

kis muñh se kahūñ maiñ ye baḌī be-adabī hai

piinā na jise chāhe kuchh us ne bhī pī hai

jo ḳhud na piye dūsroñ kī pyaas bujhā de

saaqī tire mai-ḳhāna kā mai-ḳhvār vahī hai

kis jurm kī miltī hai sazā dast-e-talab ko

har vaqt duā.eñ haiñ magar be-asarī hai

pahle mirā sar jhuktā thā har naqsh-e-qadam par

ab rāh-e-vafā mere qadam chuum rahī hai

is vaqt lagā luuñ maiñ kise apne gale se

ik samt vo haiñ ek taraf maut khaḌī hai

añgḌā.iyāñ letī huī aa.ī haiñ bahāreñ

'jāmī' kī nazar jab suu.ye gulzār uThī hai

fart-e-gham-o-hirman mein bhi yak-guna KHushi hai

nakaami paiham hai magar zinda-dili hai

afsurda hun main aap ke honTon pe hansi hai

shayad abhi takmil-e-mohabbat mein kami hai

dil shoala-ba-daman hai aur ashkon ki jhaDi hai

barsat ka mausam hai magar aag lagi hai

kis munh se kahun main ye baDi be-adabi hai

pina na jise chahe kuchh us ne bhi pi hai

jo KHud na piye dusron ki pyas bujha de

saqi tere mai-KHana ka mai-KHwar wahi hai

kis jurm ki milti hai saza dast-e-talab ko

har waqt duaen hain magar be-asari hai

pahle mera sar jhukta tha har naqsh-e-qadam par

ab rah-e-wafa mere qadam chum rahi hai

is waqt laga lun main kise apne gale se

ek samt wo hain ek taraf maut khaDi hai

angDaiyan leti hui aai hain bahaaren

'jami' ki nazar jab suye gulzar uThi hai