sang-e-dar-e-jaanan par aisi ho jabin-sai

sañg-e-dar-e-jānāñ par aisī ho jabīñ-sā.ī

ḳhud husn pas-e-parda ho jaa.e tamāshā.ī

maiñ huuñ shab-e-furqat hī yā hai mirī tanhā.ī

hai dekhne ke qābil ye anjuman ārā.ī

har zarra hai ā.īna us husn ke jalvoñ kā

vo ḳhud hī tamāshā hai aur ḳhud hī tamāshā.ī

takmīl junūñ ai dil tauhīn-e-mohabbat hai

manzil pe pahuñch jaatā hai shauq kī rusvā.ī

arbāb-e-vafā pahle marne kā chalan sīkheñ

tab un ko navāzegā andāz-e-masīhā.ī

bahlāne ko bahlā.ūñ maiñ dil ġham-e-jānāñ se

kyā hogā jo ye sūrat us dil ko na raas aa.ī

rotā hai kabhī 'jāmī' hañstā hai kabhī 'jāmī'

dīvāna to dīvāna saudā.ī to saudā.ī

sang-e-dar-e-jaanan par aisi ho jabin-sai

KHud husn pas-e-parda ho jae tamashai

main hun shab-e-furqat hi ya hai meri tanhai

hai dekhne ke qabil ye anjuman aarai

har zarra hai aaina us husn ke jalwon ka

wo KHud hi tamasha hai aur KHud hi tamashai

takmil junun ai dil tauhin-e-mohabbat hai

manzil pe pahunch jata hai shauq ki ruswai

arbab-e-wafa pahle marne ka chalan sikhen

tab un ko nawazega andaz-e-masihai

bahlane ko bahlaun main dil gham-e-jaanan se

kya hoga jo ye surat us dil ko na ras aai

rota hai kabhi 'jami' hansta hai kabhi 'jami'

diwana to diwana saudai to saudai